ლაშა თორდია: ჩემს შემცვლელად ნინო ლომჯარიას ვისურვებდი

სახელმწიფო აუდიტის სამსახურის ყოფილი ხელმძღვანელი ლაშა თორდია თანამშრომლებს დაემშვიდობა და 5-წლიანი თანამშრომლობისთვის მათ მადლობა გადაუხადა.

"ის, რაც ამ სამსახურს გამოარჩევს არის დამოუკიდებლობა, ობიქტურობა და სამათლიანობა. არცერთი აუდიტორისთვის არ დამივალებია რამის დაწერა, სწორედ ამიტომ უწყების საქმიანობამ საზოგადოების ინტერესი დაიმსახურა. შეცდომებთან დაკავშირებით ვერ ვიტყვი, რომ იყო განსაკუთრებული შეცდომა. შეცდომები შეიძლება ჩემი პირადული გავიხსენო, ის, რაც იყო ყველამ გავიგეთ და ბოდიშიც მოვიხადე. ჩემს შემცვლელად ნინო ლომჯარიას ვისურვებდი, რადგან მას არ აქვს პოლიტიკური წარსული და მის მიმათ კითხვის ნიშნები ნაკლებია. სად გავარგძელებ საქმიანობას ჯერ არ ვიცი, არის რამდენიმე შემოთავაზება თუმცა ეს პოლიტიკას არ უკავშირდება", - განაცხადა ლაშა თორდიამ.

ლაშა თორდიას გენერალურ აუდიტორად მუშაობის უფლებამოსილების ვადა დღეს ამოეწურა. მის მოვალეობას ნინო ლომჯარია ასრულებს, რადგან პირველი მოადგილეა. 

გავრცელებული ინფორმაციით, გენერალური აუდიტორის თანამდებობაზე ორი კანდიდატურა მოიაზრება. ესენი არიან: თბილისის მერი დავით ნარმანია და იურიდიულ საკითხთა კომიტეტის თავმჯდომარის მოადგილე ვანო ზარდიაშვილი.

თბილისის მერი დავით ნარმანია, ჟურნალისტების მიერ დასმულ შეკითხვაზე, განიხილება თუ არა მისი კანდიდატურა გენერალური აუდიტორის თანამდებობაზე, კონკრეტულ პასუხს არ სცემს.

ვანო ზარდიაშვილი კი ამბობს, რომ, შემოთავაზების შემთხვევაში არათუ აუდიტის სამსახურის ხელმძღვანელის, არამედ სხვა თანამდებობაზე მუშაობისთვისაც მზად არის.

6 ივლისს, საქართველოს პარლამენტის თავმჯდომარემ განაცხადა, რომ გენერალური აუდიტორის კანდიდატურა შეიძლება ივლისში წარადგინოს.

11 ივლისს გავრცელდა ინფორმაცია იმის შესახებ, რომ მთავარი აუდიტორის პოსტზე ლაშა თორდია შესაძლოა ვანო ზარდიაშვილმა შეცვალოს. 

მაისში გავრცელდა ინფორმაცია, რომ გენერალური აუდიტორის თანამდებობაზე ხელისუფლების კანდიდატურა თბილისის მერი დავით ნარმანია იყო, რომელსაც მოქმედ პოზიციაზე ვადა ოქტომბერში ეწურება. 22 მაისს, ნარმანიამ ფაქტობრივად დაადასტურა, რომ მასთან გენერალურ აუდიტორად დანიშვნის თაობაზე კონსულტაციები მიმდინარეობს, თუმცა პარლამენტის თავმჯდომარემ მოლაპარაკების ფაქტი უარყო.