შალვა პაპუაშვილი თინა ბოკუჩავასთან ინციდენტზე: ეს ძალადობა კი არა, აგრესიის აღკვეთაა

თუკი ქალბატონ თინაზე საუბრობთ, თქვენ ხომ კარგად ნახეთ რაც ხდებოდა? ახლა რომ საუბრობთ იმაზე, გასაუბრება უნდოდაო, ის ორი მანდატური რატომ გაეკიდა ქალბატონ თინას და რატომ აკავებდა? რატომ ეჭიდავებოდა ორ მანდატურს ხომ ვერ ახსნით ამას? სწორედ ეს ხომ არ იყო ძალადობა და აგრესია?, - ამის შესახებ შალვა პაპუაშვილმა პარლამენტის ბიუროს სხდომაზე განაცხადა „ნაციონალური მოძრაობის“ დეპუტატ ხატია დეკანოიძესთან კამათისას განაცხადა. განათლების კომიტეტის თავმჯდომარის თქმით, მან თინა ბოკუჩავას ხელში აყვანით აგრესიის აღკვეთა.

„თქვენ გინდათ ახლა გაასაღოთ, რომ სპიკერატში მიჭრა, მანდატურებთან ჭიდაობა და დაუმორჩილებლობა... ქალზეც და კაცზეც ძალადობა არის მიუღებელი, მაგრამ როდესაც აგრესია მოდიოდა ადამიანისგან და აგრესია მოდიოდა ამ შემთხვევაში ქალბატონი თინასგან და სწორედ ამიტომ აკავებდა მას მანდატური. რა უნდოდა იქ მანდატურს?

თქვენ ხომ ყოფილი პოლიციელი ბრძანდებით? სწორედ მანდ არის პასუხი და თუ გულწრფელი იქნებით, გასცემთ თქვენს გულში ამას პასუხს. როდესაც აგრესია მოდის, იქ სქესს არ უნდა ამოეფაროს ადამიანი. ეს არის ყველაზე არასწორი გაგება ქალთა უფლებების, რომ სქესს ამოეფაროს და ქალობა არის ინდულგენცია. რომ არ ყოფილიყო აგრესია და საფრთხე იმისა, რომ ავიდოდა პარლამენტის თავმჯდომარესთან... ბევრი რამე გვაქვს თქვენგან ნანახი, საღებავების გადასხმა გვაქვს ნანახი, რაღაც ნივთიერებების დასხმა გვაქვს ნანახი პარლამენტში და ბევრი რამ არის მოსალოდნელი. ეს ძალადობა კი არ არის, ეს არის აგრესიის აღკვეთა. ჩემი მხრიდან ეს იყო არათუ ძალადობა, ეს იყო ქალბატონი თინასგან მომდინარე პირდაპირი აგრესიის აღკვეთა, რომელსაც ორი მანდატური ვერ აკავებდა. ორ მანდატურს ეჭიდავებოდა და (მისი შეჩერება) ეს იყო არათუ ჩემი უფლება, მორალური ვალდებულებაც“, - განაცხადა პაპუაშვილმა.

საკანონმდებლო ორგანოში შინაგან საქმეთა მინისტრის სიტყვით გამოსვლისას უმრავლესობისა და ოპოზიციის წევრებს შორის სიტყვიერი დაპირისპირება მოჰყვა. „ნაციონალური მოძრაობის“ ერთ-ერთმა ლიდერმა თინა ბოკუჩავამ სპიკერატისთვის განკუთვნილ ადგილზე ასვლა სცადა, თუმცა პაპუაშვილმა ის ხელში აიყვანა და ადგილიდან გაიყვანა.