სახალხო დამცველი მშენებლობაზე მუშის დაღუპვის ფაქტს ეხმაურება

სახალხო დამცველი უჩა ნანუაშვილი გუშინ, დიდ დიღომში მშენებარე კორპუსიდან მუშის გადმოვარდნის და გარდაცვალების ფაქტზე განცხადებას ავრცელებს. ომბუდსმენი მწუხარებას გამოთქვამს მომხდარის გამო, უსამძიმრებს დაღუპულის ოჯახს და ახლობლებს.

"შრომის პირობების ინსპექტირების დეპარტამენტის ინსპექტორის განცხადებით, მშენებლობაზე, სადაც მუშა დაიღუპა, პირველადი დათვალიერებით, უსაფრთხოების ნორმები დარღვეულია, მშენებლობაზე არ იყო გათვალისწინებული და დაცული კოლექტიური და ინდივიდუალური დაცვის საშუალებები. სამუშაო ადგილებზე ადამიანების დაშავების და დაღუპვის მაღალი მაჩვენებლები აშკარად მიუთითებს იმაზე, რომ საქართველოში აღნიშნული საკითხი ძალზე მწვავედ დგას და საჭიროებს დროულ, სისტემურ და თანმიმდევრულ მიდგომას ვითარების რადიკალურად შესაცვლელად", - ნათქვამია სახალხო დამცველის განცხადებაში.

უჩა ნანუაშვილის თქმით, საქართველოს პარლამენტი ამჟამად შრომის უსაფრთხოების შესახებ კანონის პროექტს იხილავს. როგორც ომბუდსმენი აღნიშნავს, მნიშვნელოვანია ხელისუფლებამ შეძლოს ისეთი საკანონმდებლო ჩარჩოს შექმნა, რომელიც ყველა დასაქმებულისათვის მაქსიმალურად უზრუნველყოფს უსაფრთხო და ჯანსაღ სამუშაო გარემოს. სახალხო დამცველს პრინციპული შენიშვნები აქვს კანონპროექტის არსებულ ტექსტთან დაკავშირებით, თუმცა იმედოვნებს, რომ განხილვების განმავლობაში აღნიშნული მოსაზრებები გათვალისწინებული იქნება. უსაფრთხოება უნდა იყოს მთავარი პრიორიტეტი სახელმწიფოსთვის, ასევე დამსაქმებლებისა და დასაქმებულებისათვის.

უბედური შემთხვევის ფაქტს მშენებელთა პროფკავშირების წარმომადგენლები გამოეხმაურნენ. მათი განცხადებით, ობიექტს, საიდანაც მუშა გადმოვარდა, არც შრომის ინსპექტორი ჰყავს და არც უსაფრთხოების ბადეები არ არის დამონტაჟებლი. პროფკავშირები საგანგაშო სტატისტიკაზე საუბრობენ და ამბობენ, რომ მიმდინარე წელს მშენებლობაზე დაღუპულია 9 მუშა, ხოლო 2006 წლიდან დღემდე კი 271. მშენებლობაზე ტრამვირებულთა რიცხვმა 470 მიაღწია. 

უბედური შემთხვევის ფაქტს დავით ნარმანია გამოეხმაურა და განაცხადა, რომ მშენებლობებზე რეგულაციები აუცილებლად გასამკაცრებელია და კომპანიები ხშირ შემთხვევაში დაუდევრად იქცევიან. 

გუშინ, დილით დიდ დიღომში, დავით აღმაშენებლის ხეივნის მიმდებარე ტერიტორიაზე მშენებარე კორპუსიდან ახალგაზრდა კაცი გადმოვარდა. იგი ადგილზევე გარდაიცვალა. მომხდარის შესახებ შრომის ინსპექცია მოკვლევას აწარმოებს.