ირაკლი კობახიძე: პარალელური დათვლა არავითარ შემთხვევაში არ იყო ადამიანური შეცდომა

პარალელური დათვალა არავითარ შემთხვევაში არ იყო ადამიანური შეცდომა. ძალიან ბევრი ფაქტორია, რომელიც ამაზე მიუთითებს, მათ შორის 8%-იანი თითქოს მეტობა. იქაც ვერ იქნებოდა ერთი მარტივი ფორმულის შეცდომა. ეს 8% იყო დეზინფორმაციული კამპანიის ნაწილი, რასაც არ აღიარებდნენ. „პივიტის“ სიყალბის აღიარებისთვის დასჭირდათ 6 თვე. 8%-იან სიყალბეს კი დღემდე არ აღიარებენ, თუმცა ფაქტებით დასტურდება, რომ ეს არის ტყუილი, - ამის შესახებ „ქართული ოცნების“ თავმჯდომარემ, ირაკლი კობახიძემ „იმედის ფაქტორში“ განაცხადა.

„ჩვენ საქმე გვქონდა წინასწარ კარგად დაგეგმილ კამპანიასთან. ეს დაიგეგმა კონკრეტულ პოლიტიკურ პარტიაში და არა რომელიმე ორგანიზაციაში, რომელთა წარმომადგენლებიც გახდნენ ამ დეზინფორმაციული კამპანიის შემადგენელი ნაწილი სრულიად შეგნებულად. ამის საფუძვლიანი ეჭვი გვაქვს. კომისიის მუშაობამ ეს ეჭვები კიდევ უფრო მეტად გაამყარა. იმისთვის, რომ ეს აღარ განმეორდეს ჩვენ ვუღრმავდებით აბსოლუტურად ყველაფერს. საზოგადოება წინასწარ უნდა იყოს მზად ასეთი რამეებისთვის. დიდ მნიშვნელობას ვანიჭებთ ყველაფერზე დეტალურად საუბარს დღესვე, რომ მომავალში ეს არ განმეორდეს. აქ ხომ მარტივ რამეზე არ იყო საუბარი, აქ იყო საუბარი 6 თვიან საბოტაჟზე და ამან ქვეყანას მიაყენა სერიოზული ზიანი. როდესაც პარლამენტი მუშაობს ბოიკოტის რეჟიმში, ამ დროს ინვესტორსაც ნაკლები დაინტერესება აქვს ქვეყნის მიმართ. ასეთი საბოტაჟი აღარ უნდა განმეორდეს. ამიტომ არის მნიშვნელოვანი თითოეულ დეტალში ჩაღრმავება“, - განაცხადა ირაკლი კობახიძემ.