ბავშვთა სამყაროს დაზარალებულები პროკურატურასთან ერთმანეთის საწინააღმდეგო აქციებს მართავენ

"ბავშვთა სამყაროს" ხანძრით დაზარალებულთა ორი სხვადასხვა ჯგუფი მთავარ პროკურატურასთან ურთიერთსაწინააღმდეგო აქციებს მართავს. ამის შესახებ ინფორმაციას სააგენტო ipn-ი ავრცელებს.

დაზარალებულთა ერთი ჯგუფის თქმით, ისინი არიან დაზარალებულები, რომლებსაც მერიისგან არ აუღიათ 3 000-ლარიანი ომპენსაცია, განსხვავებით კონტრაქციის მონაწილეებისგან, რომლებიც ითხოვენ დაზარალებულად ცნობას, "ბავშვთა სამყაროს" სააქციო საზოგადოებისთვის ყადაღის მოხსნასა და თავიანთ ადგილებზე დაბრუნებას. 

დაზარალებულები ერთმანეთის მიმართ ბრალდებით გამოდიან. აქციის მონაწილეების ერთი ნაწილი ამბობს, რომ კონტრაქციის მონაწილეები ”ბავშვთა სამყაროს" ადმინისტრაციის მოყვანილია და მათ „ხანძრის შედეგად არანაირი ზარალი არ მიუღიათ”. 

ხანძრით დაზარალებულებმა აქცია პროკურატურასთან გუშინაც გამართეს. 

7 ივლისს, ბავშვთა სამყაროს დაზარალებულები საგამოძიებო სამსახურის ერთ-ერთ ხელმძღვანელს, რევაზ ბაღაშვილს შეხვდენენ. დაზარალებულებსა და მათ ადვოკატს პროკურატურის წარმომადგენელმა გამოძიების მიმდიანრეობის შესახებ ინფორმაცია მიაწოდა. მისი განმარტებით, უახლოეს დღეებში პროკურატურას ექნება ექსპერტიზის დასკვნა, რომელიც მომხდარზე პასუხისმგებელ პირს გამოავლენს.

თბილისში, თევდორე მღვდლის ქუჩაზე არსებული „ბავშვთა სამყარო“ 30 იანვარს დაიწვა, რამაც მოვაჭრეების პროდუქცია, ფაქტობრივად, სრულად გაანადგურა. დაზარალებულებმა რამდენიმე საპროტესტო აქცია მოაწყვეს და ხელისუფლებას მოთხოვნები წაუყენეს. მოგვიანებით, დაზარალებულები მერიის მიერ შეთავაზებულ, 3000 ლარიან კომპენსაციას დათანხმდნენ.