დავით ზალკალიანი: მადლობა ყველა ჩვენს საერთაშორისო პარტნიორს, ვინც აქტიურად იყო ჩართული საქართველოს მოქალაქეების ავღანეთიდან ევაკუაციის პროცესში

ვიცე-პრემიერის, საგარეო საქმეთა მინისტრის დავით ზალკალიანის განცხადებით, პრემიერ-მინისტრი უშუალოდ იყო ჩართული ყველა პროცესში და საგარეო საქმეთა სამინისტრო შესაბამის უწყებებთან , პრემიერ მინისტრის აპარატთან ერთად, პრეზიდენტის ადმინისტრაციასთან, თავდაცვის სამინისტროსთან და პარლამენტთან ერთად მუდმივად იყო კოორდინაციის და კომუნიკაციის რეჟიმში და ყველა ნაბიჯი იყო ეტაპობრივად დაგეგმილი იმისთვის, რომ უვნებლად გამოსულიყვნენ საქართველოს მოქალაქეები.

„თავიდანვე ჩვენ ვიყავით მუდმივად კომუნიკაციაში ჩვენს საერთაშორისო პარტნიორებთან და განსაკუთრებით მინდა გამოვყო ჩვენი ამერიკელი, ბრიტანელი, თურქი და ასევე უნგრელი კოლეგები. სწორედ მათი დახმარებით და ხელშეწყობით შესაძლებელი გახდა ჩვენი მოქალაქეების უვნებლად გამოყვანა ავღანეთიდან . პროცესი იყო უაღრესად რთული, რადგანაც მდგომარეობას ამძიმებდა ქაბულში შექმნილი სიტუაცია და მოქალაქეების უსაფრთხოდ გადაადგილების უზრუნველყოფა ფაქტობრივად იყო შეუძლებელი და იმ სიტუაციაში რომელიც ჩვენმა საზოგადოებამ იხილა, თუ რა ხდებოდა ქაბულის აეროპორტის გარშემო, ძალიან საფრთხილო იყო თითოეული ნაბიჯის დაგეგმვა“, - განაცხადა დავით ზალკალიანმა.

საგარეო საქმეთა მინისტრმა მადლობა გადაუხადა ყველას და მათ შორის საგარეო საქმეთა სამინისტროს ყველა თანამშრომელს, უშუალოდ მინისტრის მოადგილეს ალექსანდრე ხვთისიაშვილს, რომელიც ხელმძღვანელობდა ამ პროცესს და ყველა იმ საელჩოს რომელიც იყო ჩართული ამ უაღრესად რთულ პროცესში.

„პროცესი იყო გაყოფილი ორ ნაწილად . შვიდი მოქალაქე, რომლის გამოყვანაც პირველ ეტაპზე მოხერხდა რამდენიმე დღის წინ, ისინი უკვე საქართველოში იმყოფებიან. დანარჩენი საქართველოს 16 მოქალაქე, კერძო კონტრაქტორები, რომლებიც ერთ-ერთ დასავლურ კომპანიაში მუშაობდნენ , მათი გამოყვანა შედარებით გაჭიანურდა , ობიექტური პირობების გამო, თუმცა მიხარია რომ ისინი უკვე უვნებლად არიან გამოსული და მოფრინავენ საქართველოში და უახლოეს პერიოდში ისინი დაუბრუნდებიან საკუთარ ოჯახებს.“-განაცხადა დავით ზალკალიანმა.