დავით ზალკალიანი: საქართველოს 16 მოქალაქე ქაბულის აეროპორტიდან 4,5 კილომეტრში იმყოფებოდა და ეს მანძილი ურთულესი აღმოჩნდა მათი უსაფრთხოდ მიყვანისთვის

ავღანეთიდან საქართველოს მოქალაქეების მეორე ნაწილის გამოყვანის შემთხვევაში გარკვეულ გართულებებთან გვქონდა საქმე. ადგილი, სადაც ისინი იმყოფებოდნენ, საკმაოდ მოშორებით იყო აეროპორტიდან და ეს მანძილი, ოთხ-ნახევარი კილომეტრი, ურთულესი აღმოჩნდა მათი უსაფრთხოდ მიყვანისთვის,- ამის შესახებ საგარეო საქმეთა მინისტრმა დავით ზალკალიანმა „ქრონიკასთან“ საუბრისას განაცხადა.

მისი თქმით, ამჟამად საქართველოს 16 მოქალაქე პარტნიორი ქვეყნის ტერიტორიაზე იმყოფება, საიდანაც მათი გადმოყვანა ნებართვის მიღებისთანავე განხორციელდება.

„ძალიან მიხარია, რომ ყველა ქართველი, რომელიც იმყოფებოდა ქაბულში, უსაფრთხოდ არის ევაკუირებული. საზოგადოებამ კარგად იცის, რომ პირველი ნაწილი, საქართველოს 7 მოქალაქე უკვე სამშობლოშია, ისინი უსაფრთხოდ დაბრუნდნენ საკუთარ ოჯახებში და ეს მართლაც ძალიან რთული პროცესი იყო გამომდინარე იქიდან, თუ რაოდენ სწრაფად განვითარდა მოვლენები. საზოგადოებას კარგად მოეხსენება, რომ 16 აგვისტოს თალიბებმა დაიკავეს ავღანეთის დედაქალაქი და სიტუაცია ისე სწრაფად განვითარდა, რომ საერთაშორისო თანამეგობრობა ძალიან რთულ ვითარებაში აღმოჩნდა. პირველ რიგში, ერთ-ერთი მთავარი გამოწვევა იყო კოალიციის ქვეყნებისა და არა მხოლოდ მათი, ასევე ავღანეთის მოქალაქეების ქვეყნიდან გამოყვანა, რომლებიც ცდილობდნენ თავი დაეღწიათ იქ არსებული სიტუაციისთვის. ჩვენთვისაც ძალიან რთული იყო ამ პროცესებში ჩართვა, ვინაიდან ჩვენ არ გაგვაჩნია დიპლომატიური მისია ქაბულში და ჩვენ საერთაშორისო პარტნიორების ჩართულობით ვცდილობდით გამოგვეყვანა ჩვენი მოქალაქეები ტერიტორიიდან. მინდა ვისარგებლო შემთხვევით და მადლობა გადავუხადო ყველა ჩვენს საერთაშორისო პარტნიორს - ბოლო 4-5 დღის განმავლობაში მართლაც 24-საათიან რეჟიმში ვმუშაობდით. ჩემი მოადგილე უშუალოდ ხელმძღვანელობდა ამ პროცესს და ვიყავით პირდაპირ კავშირზე ჩვენს საერთაშორისო პარტნიორებთან, ვისთან ერთადაც შესაძლებელი გახდა ჩვენი მოქალაქეების სამშობლოში დაბრუნება. მე მქონდა რამდენიმე სატელეფონო საუბარი ჩემს თურქ კოლეგასთან, მევლუთ ჩავუშოღლუსთან, ისევე როგორც უნგრელ კოლეგასთან პიტერ სიიარტოსთან და ჩვენი მოქალაქეების პირველი ნაწილი სწორედ უნგრული სამხედრო თვითმფრინავით დაბრუნდა საქართველოში. მათი გამოყვანა შედარებით უმტკივნეულოდ და სწრაფად მოხდა, თუმცა მეორე ნაწილის გამოყვანის შემთხვევაში გარკვეულ გართულებებთან გვქონდა საქმე. ადგილი, სადაც ისინი იმყოფებოდნენ, საკმაოდ მოშორებით იყო აეროპორტიდან და ეს მანძილი ოთხ-ნახევარი კილომეტრი ურთულესი აღმოჩნდა მათი უსაფრთხოდ მიყვანისთვის . ქაბული აღმოჩნდა აბსოლუტურად უკონტროლო, ძალიან რთული იყო გადაადგილება, თითოეული მეტრი ძალიან საფრთხისშემცველი იყო, ამიტომ სანამ ჩვენს პარტნიორებთან ერთად არ დავრწმუნდებოდით იმაში, რომ ქართველების სიცოცხლეს საფრთხე არ შეექმნებოდა, რა თქმა უნდა, რეკომენდაციას ვერ ვაძლევდით მათ, რომ დაეტოვებინათ ის ბაზა, სადაც ისინი უსაფრთხოდ იმყოფებოდნენ. ჩვენთვის მთავარი იყო მათი უსაფრთხოდ მიყვანა აეროპორტამდე, რადგან აეროპორტს კოალიციური ძალები აკონტროლებენ. მე მიხარია, რომ მათ უსაფრთხოდ დატოვეს ავღანეთის ტერიტორია. ამ წუთებში ისინი იმყოფებიან ჩვენს ერთ-ერთი პარტნიორი ქვეყნის ტერიტორიაზე და მიმდინარეობს ტექნიკური დეტალების დაზუსტება, თუ როგორ მოხდება მათი სამშობლოში დაბრუნება. როგორც კი ნებართვა გვექნება ჩვენ მზად ვართ რომ დაუყოვნებლივ გავაგზავნოთ ბორტი, პრემიერ-მინისტრი ყოველ წუთს აკონტროლებს პროცესს და მზად არის გააგზავნოს ჩვენი ბორტი, რათა მათი სამშობლოში ტრანსპორტირება რაც შეიძლება სწრაფად მოხდეს“, - განაცხადა დავით ზალკალიანმა.