მამუკა მდინარაძე: გახარიას მცდელობის მიუხედავად, მასთან არანაირ გარიგებაში არ შევალთ, საკუთარი გუნდის მოღალატეებთან არაფერზე შეიძლება საუბარი

დღეს შედგა შეხვედრა. პირდაპირ გეტყვით, რომ კახა კალაძის ერთი გაღიმება უნდოდა იმას, რომ გახარიას დღეს კანდიდატურა არ დაეყენებინა, - ამის შესახებ „ქართული ოცნების“ ერთ-ერთმა ლიდერმა, მამუკა მდინარაძემ ჟურნალისტებს განუცხადა.

პარტია „ქართული ოცნების“ აღმასრულებელი მდივანის თქმით, პარტია „საქართველოსთვის“ თავმჯდომარემ და ახლა უკვე, თბილისის მერობის კანდიდატმა, გიორგი გახარიამ „ქართულ ოცნებას“ ერთგვარი ფინანსური გარიგება შესთავაზა იმის სანაცვლოდ, რომ გახარიას მერის პოსტზე საკუთარი კანდიდატურა არ დაეყენებინა.

„დღეს შედგა შეხვედრა. პირდაპირ გეტყვით, რომ კახა კალაძის ერთი გაღიმება უნდოდა იმას, რომ გახარიას დღეს კანდიდატურა არ დაეყენებინა და მისი კანდიდატურა არ ყოფილიყო მერობისთვის ბრძოლაში ჩართული.

როცა ჩვენ გვაქვს ისტორია, რომ მელიასთვის გადადგა გახარია და როცა დღეს უკვე, რამდენიმე წუთის წინ ვიგებთ, რომ მელიას მეორე ტურში გადასაყვანად იბრძოლებს ეს ადამიანი, სხვანაირი შეფასება წარმოუდგენელია, - ჩვენთვის სულ ერთია ეს დააყენებს თუ არა კანდიდატურას. ჩვენ მასთან არანაირ გარიგებაში, მისი მცდელობის მიუხედავად, არ შევალთ იმიტომ, რომ საკუთარი გუნდის მოღალატეებთან არაფერზე არ შეიძლება საუბარი. იმაზე, რა მინიშნებებიც იყო, ისედაც არ შეიძლება არავისთან საუბარი“, - განაცხადა მამუკა მდინარაძემ.

მისი თქმით, კახა კალაძე თვითმმართველობის არჩევნების პირველივე ტურში გაიმარჯვებს.

„რაც არ უნდა ბოდიშით დაიწყოს, რაც არ უნდა თავი მოიკატუნოს, რაც უნდა ის ქნას, კახა კალაძე ამ არჩევნებს პირველივე ტურში მოიგებს. ამის ერთ-ერთი სტიმული, მათ შორის პატარა, მაგრამ მაინც, გახარიას დღევანდელი უღირსი გადაწყვეტილებაა. ის ფიქრობს, რომ მეორე ტურში გადაიყვანს ნიკა მელიას, რომლისთვისაც ასე გაისარჯა მთელი ამ პერიოდის განმავლობაში“, - დასძინა მდინარაძემ.