ირაკლი კობახიძე: ავრცელებენ ინფორმაციას კონკრეტული გარყვნილი გეგმის შესახებ, რომელთან დაკავშირებითაც საზოგადოებას წინასწარ სრული ინფორმაცია უნდა ჰქონდეს

რაც მათ აქვთ დაგეგმილი, ეს ბოლშევიკის ჩარჩოებშიც არ ჯდება, ასეთი გეგმა მხოლოდ და მხოლოდ გვარამიას, მელაძის, დიანა ტრაპაიძისა და ინგა გრიგოლიას აზრებად შეიძლება მომწიფდეს, - ამის შესახებ პარტია „ქართული ოცნების“ თავმჯდომარემ, ირაკლი კობახიძემ ჟურნალისტებს ფარულ ვიდეოჩანაწერთან დაკავშირებით განუცხადა.

მისი თქმით, „ნაციონალური მოძრაობიდან“ გამოჟონილი ინფორმაციის შედეგად მათთვის ცნობილია, რომ არსებობს „კონკრეტული გარყვნილი გეგმა“.

„ნაციონალური მოძრაობის“ შიგნით არის მძიმე ვითარება. მათ არ აქვთ საარჩევნო პროგნოზები და მოლოდინები და ასეთ დროს ოფისებიდან, ბუნებრივია, ძალიან მარტივად ჟონავს ინფორმაცია. ეს ხდებოდა 2020 წელს, უფრო ადრეც და ეს ხდება წელსაც. მათმა წარმომადგენელმა მოგვაწოდა ჩვენ ინფორმაცია ამ ყველაფერთან დაკავშირებით. გამომდინარე იქიდან, რომ ამ კონკრეტული ადამიანისთვის, რომელიც გუნდის წევრია, სრულიად მიუღებელი და შოკისმომგვრელი იყო ინფორმაცია, გეგმა რაც მოისმინა საკუთარი გუნდის ლიდერების მხრიდან. კიდევ ერთხელ ვიტყვი, რაც მათ აქვთ დაგეგმილი, ეს ბოლშევიკის ჩარჩოებშიც არ ჯდება, მხოლოდ და მხოლოდ გვარამიას, მელაძის, დიანა ტრაპაიძისა და ინგა გრიგოლიას აზრებად შეიძლება მომწიფდეს ასეთი გეგმა“, - განაცხადა კობახიძემ.

მისი თქმით, მათი მთავარი ამოცანა სიტუაციის პრევენციაა.

„ამდენად, ავრცელებენ ინფორმაციას კონკრეტული გარყვნილი გეგმის შესახებ, რომელთან დაკავშირებითაც საზოგადოებას წინასწარ სრული ინფორმაცია უნდა ჰქონდეს. თუ ისინი ამ ყველაფრის გაკეთებას მაინც გაბედავენ, ამ შემთხვევაში მათ საკადრისი პასუხი გაეცემა“, - დასძინა კობახიძემ.

„ქართული ოცნების“ აღმასრულებელმა მდივანმა, მამუკა მდინარაძემ ბრიფინგზე განაცხადა, რომ „ნაციონალური მოძრაობა“ საჯარო პირების პირადი ცხოვრების ამსახველი კადრების გავრცელებას აპირებს.