ირაკლი კობახიძე: რასაც სააკაშვილი, უგულავა აკეთებენ, ამორალურია - დავალების მიმცემები იყვნენ ისინი და დღეს ცდილობენ, ხელი შეაწმინდონ მეგის ქარდავას, რომელიც თავისთავად უმძიმესი დამნაშავეა

სააკაშვილი, უგულავა და ა.შ. რასაც ისინი აკეთებენ, ეს არის ყველაფერთან ერთად, ამორალური, ერთი მარტივი მიზეზის გამო, დავალების მიმცემები იყვნენ ისინი და დღეს ცდილობენ, რომ ხელი შეიწმინდონ მეგის ქარდავაზე, - ამის შესახებ პარტია „ქართული ოცნების“ თავმჯდომარემ, ირაკლი კობახიძემ „პალიტრანიუსის“ ეთერში განაცხადა.

როგორც ირაკლი კობახიძემ აღნიშნა, მიხეილ სააკაშვილი და გიგი უგულავა დღეს ცდილობენ, რომ მთელი დანაშაული მხოლოდ ერთ ადამიანს გადააბრალონ. მისივე თქმით, მეგის ქარდავას დავალებებს სწორედ ეს ადამიანები აძლევდნენ.

„სააკაშვილი, უგულავა და ა.შ. რასაც ისინი აკეთებენ, ეს არის ყველაფერთან ერთად ამორალური, ერთი მარტივი მიზეზის გამო - დავალების მიმცემები იყვნენ ისინი და დღეს ცდილობენ, რომ ხელი შეიწმინდონ ამ კაცზე. ქარდავა, თავისთავად, არის უმძიმესი დამნაშავე, მაგრამ როდესაც შენ ცდილობ, რომ ხელი შეიწმინდო მხოლოდ ერთ ადამიანზე, ეს არის ამორალური, როდესაც ერთ საქმესა და ერთ უმძიმეს დანაშაულში იყავით. რა მორალზე ვსაუბრობთ, როდესაც საქმე ეხება სააკაშვილს, უგულავას და მათნაირ ადამიანებს. შეცდომები კი არა, დავალებებს ისინი აძლევდნენ, ისინი იყვნენ ლიდერები იმ უმძიმესი სისხლიანი რეჟიმის. სწორედ ეს არის ამორალური - ნაცვლად იმისა, რომ ისაუბრონ საკუთარ უმძიმეს დანაშაულზე და პირველხარისხოვანი სწორედ მათი დანაშაულია, რადგან ისინი იყვნენ დავალების მიმცემები“, - განაცხადა ირაკლი კობახიძემ.

საქართველოს თავდაცვის სამინისტროს სამხედრო პოლიციის დეპარტამენტის ყოფილი უფროსი მეგის ქარდავა უკრაინაში 11 სექტემბერს დააკავეს, დღეს კი საქართველოში ექსტრადიცია განხორციელდა. საქართველოს პროკურატურა მეგის ქარდავას ექსტრადირებას მის წინააღმდეგ არსებული სისხლის სამართლის 11 საქმეზე ითხოვდა. გარკვეულ საქმეებზე ქარდავა დაუსწრებლად არის მსჯავრდებული, ხოლო დანარჩენი საქმეები არსებითად განიხილება შესაბამის სასამართლოებში.

მეგის ქარდავა თავდაპირველად 2018 წელს, რუმინეთის ტერიტორიიდან ყალბი პასპორტის მეშვეობით უკრაინაში შეღწევის მცდელობისას დააკავეს. იმავე წლის დეკემბერში მას საექსტრადიციო პატიმრობა შინაპატიმრობით შეეცვალა