კახა კუჭავა: 9 წლის წინ ქართველმა ხალხმა ბიძინა ივანიშვილის ლიდერობით უდიდეს გამარჯვებას მიაღწია, სწორედ მისი პრემიერობის დროს ჩაეყარა საფუძველი ევროპული ტიპის საპარლამენტო რესპუბლიკის შექმნას

9 წლის წინ ქართველმა ხალხმა, „ქართულმა ოცნებამ“ ბიძინა ივანიშვილის ლიდერობით უდიდეს გამარჯვებას მიაღწია და სწორედ მისი პრემიერ-მინისტრობის დროს ჩაეყარა საფუძველი ევროპული ტიპის საპარლამენტო რესპუბლიკის შექმნას, რომელსაც გარკვეული პერიოდი დასჭირდა და ეს იყო წარმატებების გზა, - ამის შესახებ საქართველოს პარლამენტის თავმჯდომარემ, კახა კუჭავამ „იმედის“ ეთერში განაცხადა.

კახა კუჭავამ იმ მთავარ მიღწევებზე ისაუბრა, რაც ქვეყანაში „ქართულმა ოცნების“ მმართველობის პერიოდში განხორციელდა.

„აუცილებელია რამდენიმე მნიშვნელოვანი მოვლენა ვახსენოთ. ერთ-ერთი მთავარი ჩვენი პრიორიტეტი, რასაც მოსახლეობას ვპირდებოდით, ეს არის ოკუპირებული ტერიტორიების დაბრუნება და ქვეყნის გამთლიანება. არ შეიძლება არ აღვნიშნოთ ის წარმატება, რომელსაც ჩვენ მივაღწიეთ ამ გზაზე. საუბარია, იმ უპრეცედენტოდ მაღალ მხარდაჭერაზე, რომელიც ჩვენ გვაქვს საერთაშორისო საზოგადოების მხრიდან. საუბარია, გაეროს რეზოლუციაზე, სადაც ყოველწლიურადაა მატება იმ ქვეყნების, რომლებიც მხარს უჭერს ჩვენს ტერიტორიულ მთლიანობასა და სუვერენიტეტს. არ შეიძლება, არ ვახსენოთ ჩვენს სტრატეგიულ პარტნიორთან, ამერიკის შეერთებულ შტატებთან უპრეცედენტოდ მაღალი დონის თანამშრომლობა და უკვე მათთან საკანონმდებლო დონეზე ჩანაწერების გაკეთება - რა სანქციები დაწესდება, იმ შემთხვევაში, თუ ვინმე ოკუპირებულ ტერიტორიებს აღიარებს.

რა თქმა უნდა, ევროინტეგრაციის გზა ჩვენს დღევანდელობაში მთავარი პრიორიტეტია, ის ხელშეკრულება, რომელიც პრემიერ-მინისტრმა, ირაკლი ღარიბაშვილმა მოაწერა ხელი 2014 წელს - ასოცირების შეთანხმება. მას შემდეგ მოჰყვა თავისუფალი ვაჭრობის შესახებ შეთანხმება; ამას ასევე მოჰყვა, მაშინ ძალიან სანატრელი თავისუფალი მიმოსვლა ევროკავშირის ქვეყნებში“, - განაცხადა კუჭავამ.

მისივე თქმით, ასევე არ შეიძლება არ აღინიშნოს უმნიშვნელოვანესი საკონსტიტუციო რეფორმა, რომელიც მე-9 მოწვევის პარლამენტმა განახორციელა.

„ჩვენ ნამდვილად შევცვალეთ კონსტიტუცია ისე, როგორც ამას ჩვენი მოსახლეობა მოითხოვდა. უნდა ითქვას, ალბათ, პირველი საკონსტიტუციო ცვლილება იყო, რომელიც მმართველმა პარტიამ თავის საზიანოდ განახორციელა, რადგან გაცილებით უფრო გაძლიერებულია ჩვენი ოპონენტების უფლებები. ასევე, უპრეცედენტოდ დიდი ზედამხედველობის ფუნქციები, რომელიც ადრე პარლამენტს არ ჰქონდა. ასევე, ჩვენს მიერ განხორციელებული ცვლილებები საარჩვნო ბარიერის დაწევასთან დაკავშირებით, რომელმაც მრავალპარტიული პარლამენტი უზრუნველყო. ეს რეფორმა პარლამენტის მაშინდელი ხელმძღვანელის ირაკლი კობახიძის მიერ განხორციელდა“, - განაცხადა კუჭავამ.