დავით ზალკალიანი: ჩემი ვარაუდია, რომ სააკაშვილმა საზღვრის კვეთისას უკრაინის კანონმდებლობაც დაარღვია

საგარეო საქმეთა მინისტრ დავით ზალკალიანის განცხადებით, მას აქვს ეჭვი, რომ ექსპრეზიდენტმა მიხეილ სააკაშვილმა საზღვრის კვეთის დროს უკრაინის კანონმდებლობაც დაარღვია.

როგორც დავით ზალკალიანმა „იმედის კვირაში“ განმარტა, ამის თქმის საფუძველს უკრაინის პრეზიდენტის განცხადება აძლევს, სადაც ამბობს, რომ მან სააკაშვილის მიერ ქვეყნის დატოვების შესახებ არაფერი იცოდა.

„მე მაქვს გარკვეული კითხვები, როგორ მოახერხა და ჩემი ვარაუდია, რომ ის უკრაინიდან ისე გამოვიდა, რომ მას შესაძლოა უკრაინის კანონმდებლობაც ჰქონდეს დარღვეული. ამის თქმის საფუძველს მაძლევს თუნდაც პრეზიდენტ ზელენსკის დღევანდელი განცხადება, როდესაც მან თქვა, რომ მისთვისაც მოულოდნელი იყო და მედიისგან შეიტყო სააკაშვილის უკრაინიდან გაუჩინარება. ყველა ჩვენი კომუნიკაცია უკრაინელ პარტნიორებთან მიმყარებს ამის თქმის საფუძველს, მათთვისაც ეს სიურპრიზი იყოს. არ არის გამორიცხული, ჩემი ვარაუდია, ალბათ, გამოძიება გასცემს პასუხს, რომ მას უკრაინის კანონმდებლობაც ექნება დარღვეული საზღვრის კვეთასთან დაკავშირებით“, - განაცხადა დავით ზალკალიანმა.