ნარმანია: ამ 3 წლის განმავლობაში დღე და ღამე ვმუშაობდით

თბილისის მერმა დავით ნარმანიამ თბილისის მთავრობის სხდომაზე სამწლიანი მუშაობა შეაჯამა. მისი თქმით, ზუსტად 3 წლის წინ, აგვისტოს დასაწყისში დედაქალაქის მმართველობას სათავეში ჩაუდგა ახალი გუნდი და მათ საკმაოდ რთული მდგომარეობა დახვდათ:

"პირველ რიგში, გეტყვით, რომ ჩვენ დაგვხვდა ფაქტობრივად განულებული ბიუჯეტი და ქალაქი, რომლისთვისაც გამოყოფილი თანხები იხარჯებოდა კონკრეტული პირების პირადი კეთილდღეობისთვის და ამ მძიმე მემკვიდრეობის ფონზე, ჩვენ დაგვჭირდა ძალიან დიდი შრომა, რათა აგვენაზღაურებინა დაკარგული დრო და პარალელურ რეჟიმში, გვეზრუნა ქალაქის განვითარებაზე“, - განაცხადა დავით ნარმანიამ.

"ჩვენ ამ სამი წლის განმავლობაში არ გავჩერებულვართ და მართლაც დღე და ღამე ვმუშაობდით. ამ ყველაფრის შედეგია ის, რომ ჩვენმა საზოგადოებამ ძალიან ბევრი სიკეთე მიიღო ქალაქის მმართველობისგან", - თქვა ნარმანიამ.

თბილისის მერმა გზის სარეაბილიტაციო სამუშაოებზე ილაპარაკა. მისი თქმით, გზის სარეაბილიტაციო და მიმდინარე შეკეთების სამუშაოები ჩაუტარდა – 4 მილიონზე მეტ კვ.მ ფართს, აქედან კაპიტალურად შეკეთდა 2 მილიონი მ2-მდე გზის საფარი, სულ 207 ქუჩა.

ასევე, აშენდა ახალი და რეაბილიტაცია ჩაუტარდა არსებულ ხიდებს, მათ შორის იყო: პუშკინის ესტაკადა, ბარათაშვილის ხიდი, გულიას ხიდი. გარდა ამისა, აშენდა ახალი გზები: სამება-მახათის დამაკავშირებელი გზა, კრწანისი შინდისის გზა და სხვ.

თბილისის მერმა ხაზი გაუსვა 13 ივნისის სტიქიის სალიკვიდაციო ღონისძიებებს და აღნიშნა, რომ ამისთვის 90 000 000 ლარი დაიხარჯა.

"ჩვენ დაგვჭირდა ძალიან დიდი რესურსების მობილიზება სტიქიის შედეგად დანგრეული და განადგურებული ინფრასტრუქტურის აღსადგენად, დაზარალებული მოქალაქეების დასაკმაყოფილებლად, თუმცა ამ შემთხვევაშიც შევძელით და პარალელურ რეჟიმში არ შევაჩერეთ ქალაქში არსებული გამოწვევების დაძლევა, წინსვლასა და განვითარებაზე ზრუნვა", - განაცხადა დავით ნარმანიამ.

თბილისის მერმა ყურადღება გაამახვილა ახალი საბავშვო ბაღების მშენებლობასთან დაკავშირებითაც. მისი თქმით, 2014-17 წლებში თბილისში აშენდა და ექსპლუატაციაში შევიდა 12 ახალი, თანამედროვე სტანდარტების შესაბამისი საბავშვო ბაგა-ბაღი. გარდა ამისა, მიმდინარეობს 13 ახალი საბავშვო ბაღის მშენებლობა. 2014 წლიდან დღემდე, თბილისის ბაღებში ბავშვების რაოდენობა 7 595-ით გაიზარდა, ხოლო ახალი სასწავლო წლიდან, 5 ახალი ბაღის გახსნით, კიდევ 1500-მდე ბავშვი შეძლებს სკოლამდელი განათლების მიღებას.

დავით ნარმანიას განცხადებით, წარმატებით განხორციელდა ასევე პროექტ „ახალი ტფილისის“ პირველი ეტაპი და თბილისის ავტოპარკის განახლების პროექტი.

"ავტოპარკი განვაახლეთ Man-ის 143 ახალი, ადაპტირებული, თანამედროვე ტიპის და ეკოლოგიურად სუფთა ლურჯი ავტობუსით. ავაშენეთ და გავხსენით ახალი მუნიციპალური ავტობაზა. გარდა ამისა, თბილისის მეტროში აქტიურად მიმდინარეობს ვაგონების მოდერნიზაცია. 2016 წელს მოდერნიზდა 4 და გარემონტდა - 16 ვაგონი. მიმდინარე წლის ბოლომდე მოდერნიზდება კიდევ 8 ვაგონი და გარემონტდება - 24. აღვადგინეთ კუს ტბის საბაგირო. აქვე გეტყვით, რომ უკვე დასრულდა მთაწმინდის საბაგიროს რეაბილიტაციის საპროექტო სამუშაოები. დაწყებულია მშენებლობის წინამოსამზადებელი პროცესი“, - განაცხადა დავით ნარმანიამ.

თბილისის მერის თქმით, 2014-2017 წლებში მოეწყო 149 ახალი სკვერი და რეაბილიტაცია ჩაუტარდა 440-ს. დედაქალაქის მასშტაბით, 2014 წლიდან 2017 წლის ბოლომდე დარგული იქნება 700 000-ზე მეტი ხე-მცენარე.

დავით ნარმანიას განცხადებით, შემუშავდა მიწათსარგებლობის განახლებული გენერალური გეგმა. დოკუმენტზე 200-მდე სპეციალისტმა და საერთაშორისო კონსორციუმმა იმუშავა. ამჟამად, მომზადებული დოკუმენტაციის საჯაროდ განხილვა მიმდინარეობს.

„უნებართვო გარევაჭრობის წინააღმდეგ შესაბამისი ღონისძიებები განხორციელდა. გარდა ამისა, თბილისის მერიის ჯანდაცვისა და სოციალური მომსახურების საქალაქო სამსახური, საანგარიშო პერიოდში, ყოველწლიურად ადმინისტრირებას უწევდა 29-31 პროგრამას. 2014-2017 წლებში 10 ახალი პროგრამა განხორციელდა. სოციალური პროგრამების უმეტესობის დაფინანსება გაიზარდა, ნაწილი გაორმაგდა“, - აღბიშნა დედაქალაქის მერმა.

,,ეს, რა თქმა უნდა, არასრული ჩამონათვალია იმისა, თუ რა გაკეთდა ჩვენი ქალაქისთვის ბოლო სამი წლის განმავლობაში და უფრო დეტალურად ამ ყველაფრის შესახებ მე შემაჯამებელი ანგარიშით წარვდგები საზოგადოების წინაშე”, - განაცხადა დავით ნარამანიამ.

დავით ნარმანიამ სხდომის დაწყებამდე თბილისის სარეკრეაციო ზონის ზრდაზეც ილაპარაკა და თქვა, რომ დიღმის გასხვისებული ტყე-პარკის ნაწილიდან სარეკრეაციო სივრცის სახით თბილისს კიდევ 1,5 ჰექტარი დაუბრუნდა. თბილისის მერმა მთავრობის სხდომის დაწყებამდე კომენტარი გააკეთა მერიაში მმართველი გუნდის აქტივისტების დასაქმების შესახებ გავრცელებულ ინფორმაციაზე, რასაც სიცრუე უწოდა. მან ასევე განაცხადა, რომ მიმდინარეობს გზის კვლევა, რათა პეკინის ქუჩა ცალმხრივი გახდეს.