არჩილ თალაკვაძე: განსაკუთრებულ მადლობას ვუხდი ოზურგეთელებს, სადაც დიდი სხვაობით მოვუგეთ მთავარ კონკურენტს და საკრებულოშიც მყარი უმრავლესობა მოვიპოვეთ

ამ არჩევნებმა კიდევ ერთხელ დაადასტურა, რომ „ქართულ ოცნებას“ საპარლამენტო არჩევნებშიც ნამდვილი და ლეგიტიმური შედეგი ჰქონდა, ვინაიდან ეს შედეგი ჩვენ ბოლო არჩევნებზეც გავიმეორეთ. ჩვენმა გუნდმა დაამტკიცა, რომ ძლიერი მხარდაჭერა აქვს და მე მინდა, კიდევ ერთხელ გადავუხადო მადლობა ჩვენს მხარდამჭერებს, - ამის შესახებ პარლამენტის ვიცე-სპიკერმა, არჩილ თალაკვაძემ განაცხადა.

„პირველ შემთხვევაში, როდესაც ხელოვნური პოლიტიკური კრიზისი იყო და ოპოზიცია საბოტაჟის რეჟიმში იმყოფებოდა, ​​ჩვენ არ შევუწყვიტეთ მანდატები პარლამენტის წევრებს, ვინაიდან ჩავთვალეთ, რომ იყო დემოკრატიისა და საკანონმდებლო ინსტიტუტისთვის ძირის გამოთხრის მცდელობა. ამ გადაწყვეტილებით ჩვენ მივეცით შესაძლებლობა ოპოზიციის ჯანსაღ ნაწილს, რომ შემოსულიყვნენ პარლამენტში, და ასეც მოხდა. ამის შემდეგ რადიკალური ოპოზიცია იძულებული გახდა, მიშელის შეთანხმების ფარგლებში შემოსულიყო პარლამენტში. რა თქმა უნდა, მათი ერთადერთი მიზანი იყო, როგორმე „ქართული ოცნება“ 43%-ის ქვემოთ ჩამოეყვანათ, მაგრამ ამ არჩევნებმა კიდევ ერთხელ დაადასტურა, რომ „ქართულ ოცნებას“ საპარლამენტო არჩევნებშიც ნამდვილი და ლეგიტიმური შედეგი ჰქონდა, ვინაიდან ეს შედეგი ჩვენ ბოლო არჩევნებზეც გავიმეორეთ. ჩვენმა გუნდმა დაამტკიცა, რომ ძლიერი მხარდაჭერა აქვს და მე მინდა, კიდევ ერთხელ გადავუხადო მადლობა ჩვენს მხარდამჭერებს. ჩვენ მზად ვართ, მომავალზეც ავიღოთ პასუხისმგებლობა და ყველაფერს გავაკეთებთ, რათა მივაღწიოთ უფრო მეტ პროგრესს თითოეულ მუნიციპალიტეტში. განსაკუთრებული მადლობა მინდა გადავუხადო გურულებს, ოზურგეთელებს, ვინაიდან ბოლო ორი თვის განმავლობაში სწორედ იქ ვიყავი ჩართული. მიუხედავად იმისა, რომ ჩვენ იქ ვუპირისპირდებოდით ადგილობრივ მოქმედ მუნიციპალურ ხელისუფლებას, „ნაციონალურ მოძრაობას“, გიორგი გახარიას პარტიას - დამაჯერებელი შედეგი მივიღეთ - დიდი სხვაობით მოვუგეთ მთავარ კონკურენტს და საკრებულოშიც მყარი უმრავლესობა მოვიპოვეთ“, - განაცხადა არჩილ თალაკვაძემ.