ტიტე აროშიძე: პოლიტიკური ოპონირების დრო ამ მძიმე წუთებში არ არის

გრძელდება სამძებრო-სამაშველო სამუშაოები. ძირითადი ნაწილი ნანგრევების უკვე გაწმენდილია, თუმცა მასა საკმაოდ დიდია და რამდენი ადამიანი იმყოფება ინფორმაცია არ გვაქვს. სამწუხაროდ გვაქვს მსხვერპლიც. უდიდესი ტრაგედიაა და ვიზიარებ, - ამის შესახებ აჭარის უმაღლესი საბჭოს თავმჯდომარის მოადგილემ, ტიტე აროშიძემ განაცხადა.

„სამასამდე ადამიანი მუშაობს უწყვეტ რეჟიმში. მერიაში უკვე შექმნილია შესაბამისი კომისია. იმოქმედებს ცხელი ხაზი და აბსოლუტურად ყველა ადამიანს, რომელიც ამ ბინებიდან გავიყვანეთ, მაქსიმალური ყურადღება მიექცევათ და დაკმაყოფილებულები იქნებიან დროებითი საცხოვრებლებით. ახლა არ არ არის პოლიტიკური ოპონირების დრო და ძალიან ამორალური საქციელია ვისაუბროთ პოლიტიკურ განცხადებებზე. ეს არის ქალაქის ტრაგედია და ყველა მობილიზებულია, მობილიზებულია სპეცტექნიკას და ყველაფერთან დაკავშირებით დროულად მოხდა რეაგირება. შექმნილია საგამოძიებო კომისიაც. პოლიტიკური ოპონირების დრო ამ მძიმე წუთებში არ არის“, - განაცხადა ტიტე აროშიძემ.

ბათუმში, 26 მაისის ქუჩაზე მომხდარი ნგრევის შემდეგ, მაშველებმა ნანგრევებიდან კიდევ ერთი ადამიანი, ახალგაზრდა კაცი ამოიყვანეს.

მანამდე, დაახლოებით ერთი საათის წინ, მაშველებმა ნანგრევებიდან ახალგაზრდა ქალი ამოიყვანეს. ის კლინიკაშია გადაყვანილი, სადაც მას სამედიცინო დახმარებას უწევენ.

ბათუმში, 26 მაისის ქუჩაზე, სადაც საცხოვრებელი კორპუსის სადარბაზო ჩამოინგრა, სამძებრო-სამაშველო ღონისძიებები გრძელდება. სადარბაზო, დაახლოებით, 12:00 საათზე ჩამოინგრა. დაშავებულთა შორის არასრულწლოვნებიც არიან. ერთ-ერთ მათგანს, ზედაპირული დაზიანებების გარდა, ქვედა კიდურის დაზიანებაც აღენიშნება. ​კორპუსის ნანგრევებში მოყოლილი ორი ადამიანი პოლიციასთან კონტაქტზე გავიდა. მიმდინარეობს მათი სამძებრო სამუშაო.

ბათუმის მერიის ინფორმაციით, კორპუსი, რომლის ნაწილიც ჩამოინგრა, საცხოვრებლად ვარგისი იყო.

შს მინისტრის, ვახტანგ გომელაურის განცხადებით, ნანგრევებში, დაახლოებით, 10-დან 15 ადამიანამდეა მოყოლილი. მისივე თქმით, მომხდარზე გამოძიება სამშენებლო სამუშაოს წარმოებისას უსაფრთხოების წესის დარღვევის მუხლით დაიწყო.

სამაშველო ღონისძიებებს ადგილზე გაეცნო ირაკლი ღარიბაშვილი. მთავრობის მეთაურის განცხადებით, კორპუსის ნგრევისას დაშავებულებსა და დაზარალებულებს სახელმწიფო დაეხმარება.