სალომე ზურაბიშვილი: მოსახლეობამ უნდა დაინახოს, რომ ევროკავშირთან დაახლოება არის კონკრეტული და მიდის წინ

საქართველოს სწრაფვა ევროკავშირისკენ წარმოადგენს კონსენსუსის საკითხს არა მარტო პოლიტიკურ პარტიებს შორის, არამედ საზოგადოებაში და ეს არ შეცვლილა ამ წლების განმავლობაში და არ შეიცვლება, - ამის შესახებ, სალომე ზურაბიშვილმა ავსტრიის რესპუბლიკის ფედერალურ პრეზიდენტ ალექსანდერ ვან დენ ბელენთან გამართულ ერთობლივ პრესკონფერენციაზე განაცხადა.

„მაგრამ საჭიროა, რომ ჩვენ დავინახოთ კონკრეტული სვლები, ამაზე ვმუშაობთ. 2024 წლის განაცხადი, ერთი მხრივ, არის პერსპექტივა, რომელიც უნდა დავინახოთ და ამ პერსპექტივის მიმართულებით უფრო აქტიურად ვიაროთ იმ რეფორმების გზაზე, რომელიც ვიცით, რომ აუცილებელია. თქვენ ახსენეთ სასამართლო რეფორმა, ესაა ერთ-ერთი მიმართულებაა, რომელზედაც გარდაუვალია ჩვენი წინსვლა და აქტიურად უნდა ჩავერთოთ ამ მიმართულებით. ამავე დროს 2024 წელი უნდა იყოს ასოცირების სხვადასხვა დარგში იმპლემენტაციის წელი. უნდა დაინახოს საქართველოს მოსახლეობამ, რომ ის დაახლოება ევროკავშირთან გაწევრიანებამდე მიდის წინ. ეს ეხება იმ პროექტებს, რომელიც უკვე არსებობს ევროკავშირში, როგორიცაა შავ ზღვაზე ახალი ინფრასტრუქტურული პროექტები და რომელზედაც ყველანი ერთად ვმუშაობთ.

ძალიან მნიშვნელოვანია, რომ ევროკავშირი ჩაერთო ბატონი შარლ მიშელის მეშვეობით ჩვენი პოლიტიკური კრიზისის გადალახვაში, ესაა ნიშანი არა ჩარევის, არამედ ესაა ნიშანი ინტერესის ევროკავშირიდან, რომ სტაბილურობა ამ რეგიონსა და ქვეყანაში იყოს შენარჩუნებული. ესაა სიახლოვის ნიშანი. შენ თუ იმდენად ყურადღებით ხარ შიდა პოლიტიკის განვითარებაზე, ეს ნიშნავს, რომ ჩვენ უცხო არა ვართ. თუ არსებობს რაღაც ფორმით, ევროკავშირში გაფართოების მიმართ დაღლილობა, ეს სინდრომი დაღლილობის არ შეიმჩნევა საქართველოში“, - აღნიშნა ზურაბიშვილმა.

სალომე ზურაბიშვილის ოფიციალური ვიზიტი ავსტრიაში 11 ოქტომბერს დაიწყო.