ჩოგოვაძე: 2017 წელს საქართველოში ტურისტების რაოდენობა 7 მილიონს მიაღწევს

ტურიზმის ადმინისტრაციამ შინაგან საქმეთა სამინისტროსთან ერთად ივლისის მონაცემები შეაჯამა. სტატისტიკის მიხედვით, მიმდინარე წლის ივლისში საქართველოში მილიონამდე საერთაშორისო მოგზაური შემოვიდა.

ტურიზმის ეროვნული ადმინისტრაციის ხელმძღვანელი გიორგი ჩოგოვაძე ვარაუდობს, რომ წელს საქართველოში ტურისტების რეკორდული რაოდენობა იქნება და მათი რიცხვი 7 მილიონს მიაღწევს.

„ივლისში ტურისტების რაოდენობის 33%-იანი მატება გვაქვს. ეს ყველაფერი გვაძლევს საშუალებას, ვივარაუდოთ, რომ 2017 წელი ტურისტების რაოდენობის თვალსაზრისით ახალი რეკორდების წელიწადი იქნება და ტურისტების რაოდენობა 7 მილიონს გადააჭარბებს. საქართველო შემოსავლების მხრივ როგორც ჩვენი მეზობელი. ისე ევროკავშირის ქვეყნები ლიდერობენ. ასევე, ის ახალი ბაზრები, რომლებიც ჩვენ ბოლო წლების განმავლობაში აღმოვაჩინეთ და განვავითარეთ. დატვირთულია როგორც, აჭარის რეგიონი და შავი ზღვისპირა სანაპირო, ისე ჩვენი მთიანი რეგიონები და კახეთი“, - განაცხადა გიორგი ჩოგოვაძემ.

შსს-ს საინფორმაციო ანალიტიკური დეპარტამენტის წარმომადგენელის ლია მელაძის განმარტებით, ტურისტული სეზონი აქტიურ ფაზაშია.

„სულ ივლისში 982 487 ვიზიტი განხორციელდა, რაც 2016 წლის ანალოგიურ პერიოდთან შედარებით 28.9%-ით მეტია. ტურისტების ყველაზე მზარდი რაოდენობა მეზობელი ქვეყნებიდან გვაქვს. ეს ქვეყნებია რუსეთი, სომხეთი, აზერბაიჯანი, თურქეთი, უკრაინა და ირანი. საქართველოში შემომსვლელთა კუთხით ევროკავშირის ქვეყნების მიმართულებით მზარდი რაოდენობაა. აღსანიშნავია ამერიკის შეერთებული შტატების მოქალაქეების 28%-იანი ზრდა“, - განაცხადა ლია მგელაძემ.

ტურიზმის ეროვნული სააგენტოს ხელმძღვანელმა უკვე დააანონსა, რომ შესაძლებელია კლიპი მეშვიდიმილიონე ტურისტის საქართველოში შემოსვლაზეც გადაიღონ.