არასამთავრობოები საჯარო მოსამსახურეთა გამოხატვის შეზღუდვაზე ირაკლი კობახიძის განცხადებას ეხმიანებიან

9 არასამთავრობო ორგანიზაცია ეხმიანება პარლამენტში თვითმმართველობის კოდექსზე პრეზიდენტის მოტივირებული შენიშვნების განხილვისას, პარლამენტის თავმჯდომარის, ირაკლი კობახიძის მიერ საქართველოს პრეზიდენტის საპარლამენტო მდივნის, ანა დოლიძის მისამართით გამოთქმულ მითითებას საჯარო მოსამსახურეთა მიერ აზრის გამოხატვის შეზღუდვასთან დაკავშირებით.

არასამთავრობოები ფიქრობენ, რომ კობახიძემ უზუსტობა დაუშვა. კერძოდ, “საქართველოს საჯარო სამსახურის” ახალი კანონის შესაბამისად, რომელიც 2017 წლის 1 ივლისს ამოქმედდა, პრეზიდენტის საპარლამენტო მდივნებზე “საჯარო სამსახურის შესახებ” კანონის მოქმედება არ ვრცელდება. 

"შესაბამისად, ამ პოზიციაზე დასაქმებული პირები არ ითვლებიან საჯარო მოსამსახურეებად. თუმცა, ასეთი შეცდომა ბევრად უფრო ნაკლებ საფრთხეს წარმოადგენს საჯარო სამსახურისთვის, ვიდრე პარლამენტის თავმჯდომარის განცხადება, რომელმაც, შესაძლოა, გამოიწვიოს საჯარო მოსამსახურეთა აზრის გამოხატვის თვითშეზღუდვა, მათ შორის, პოლიტიკურ თანამდებობის პირებთან მიმართებით.  

პარლამენტის თავმჯდომარემ თავის მიმართვაში აღნიშნა, რომ საჯარო მოსამსახურე „პოლიტიკოსებზე არ საუბრობს“. პირველ რიგში, არცერთ საკანონმდებლო აქტში არ არსებობს ჩანაწერი, რომელიც საჯარო მოსამსახურეს პოლიტიკოსებზე საუბარს შეუზღუდავდა. ამასთან, პარლამენტის თავმჯდომარემ მიუთითა, რომ ეთიკის სტანდარტების დარღვევაა საჯარო მოსამსახურის მხრიდან პოლიტიკოსებზე საუბარი, რაც აბსოლუტურად მცდარი წარმოდგენაა ეთიკის წესებზე. ეთიკის წესები ემსახურება საჯარო მოსამსახურეთა მიერ თავიანთი ვალდებულებების კეთილსინდისიერად, ანგარიშვალდებულად და ეფექტიანად შესრულების მიზანს და არა პოლიტიკოსების საჯარო მოსამსახურეთა კრიტიკისგან დაცვის მიზანს. ამასთან, საჯარო მოსამსახურეც არის პირი, რომელიც პოლიტიკოსს ირჩევს და სრული უფლება აქვს, მასზე საკუთარი აზრი გააჩნდეს.

ამ ფონზე, პარლამენტის თავმჯდომარის განცხადება საჯარო მოსამსახურეების მიერ, შესაძლოა, აღქმული იყოს, როგორც ხელისუფლების მიმართ კრიტიკული აზრის გამოთქმის აკრძალვა. ასეთ შთაბეჭდილებას, შესაძლოა, აძლიერებდეს ისიც, რომ სახელმწიფო პოლიტიკური თანამდებობის პირები საჯარო სამსახურისა და პოლიტიკის გამიჯვნაზე მხოლოდ მაშინ საუბრობენ, როდესაც ესა თუ ის საჯარო მოსამსახურე მათთვის მიუღებელ აზრს გამოთქვამს", - წერია განცხადებაში.

მიმართვას ხელს აწერენ: საია, ღია საზოგადოება - საქართველო, ინფორმაციის თავისუფლების განვითარების ინსტიტუტი, კონსტიტუციის 42-ე მუხლი, მმართველობითი სისტემების განვითარების ცენტრი, საქართველოს სტრატეგიული კვლევებისა და განვითარების ცენტრი, რეგიონის განვითარების ცენტრი, სამოქალაქო კულტურის საერთაშორისო ცენტრი, საქართველოს მედია კლუბი. განცხადების სრული ტექსტი იხილეთ ამ ლინკზე. 

პრეზიდენტის საპარლამენტო მდივანმა, ანა დოლიძემ პარლამენტის თავმჯდომარე ირაკლი კობახიძეს რამდენიმე დღის წინ უზრდელი უწოდა.

ეს განცხადება ანა დოლიძემ მას შემდეგ გააკეთა, რაც პრეზიდენტის ვეტოს განხილვის დროს მასსა და პარლამენტის თავმჯდომარეს შორის შელაპარაკება მოხდა.

28 ივლისს საპარლამენტო უმრავლესობამ ერთობლივი განცხადება გაავრცელა, სადაც ნათქვამია, რომ პრეზიდენტის საპარლამენტო მდივანმა უხეშად დაარღვია ეთიკის და კონსტიტუციურ ინსტიტუტებს შორის ურთიერთობის ნორმები. ამ განცხადებას თავად პრეზიდენტი გამოეხმაურა და განაცხადა რომ მის მრჩეველს, რომელიც არასდროს ყოფილა რომელიმე პარტიის წევრი, ხელს უშლიან კონსტიტუციური მოვალეობის შესრულებაში.