მოსწავლელები, პენსიონერები და სტუდენტები - რას ატყუებს ნიკა მელია ამომრჩევლებს, როცა მათ მერის უფლებამოსილების მიღმა არსებულ სიკეთეებს ჰპირდება და რატომ სურს უკვე არსებული სასტიპენდიო პროგრამის თავიდან დაწყება

ნიკა მელიამ მეორე ტურისთვის ბრძოლა ისევ ტყუილით დაიწყო. დედაქალაქის ქუჩებში გამოჩნდა ბანერები დაპირებებით. მაგალითად, ნიკა მელია ამომრჩეველს საჯარო სკოლებში უფასო კვებას ჰპირდება, რაც მერის უფლებამოსილებაში არ შედის. მერის უფლებებს კიდევ მრავალი დაპირება სცდება, თუმცა, ამას ხელი არ შეუშლია „ნაციონალური მოძრაობის“ მერობის კანდიდატისთვის, საარჩევნო დაპირებები ბანერებზე განეთავსებინა.

„ქართული ოცნების“ თავმჯდომარე, ირაკლი კობახიძე, მელიას დაპირებებს სრულ აბსურდს უწოდებს.

„ბანერებზე რაც წერია, სრული აბსურდია. იგივე ეხება პენსიებს. ერთია, რომ, კანონით, მას ამის უფლება არ აქვს და მეორე ის, რომ ამას სჭირდება 240 მილიონი ლარი. რაც შეეხება სკოლებს - კანონით, მას არ აქვს ამის გაკეთების უფლება და ამას სჭირდება დამატებით 100 მილიონზე მეტი ლარი. რას აკლებს ამას? ჯანდაცვას თუ სხვა მიმართულებებს? ეს განცხადებები არის აბსურდი და სასოწარკვეთილი ნაბიჯი, იქედან გამომდინარე, რომ მელია თბილისში არჩევნებს აგებს“, - განაცხადა ირაკლი კობახიძემ.

კახა კალაძის თქმით, მელიას ყველა დაპირება ძალიან დიდი ტყუილია. „მელიას ისიც ვერ გაურკვევია, რომ სკოლები მუნიციპალიტეტის დაქვემდებარებაში არ არის. მუნიციპალიტეტს რაც შეეხება, უამრავი მიმართულებით არის ნაბიჯები გადასადგმელი და არა ის ტყუილი დაპირებები, რასაც ვხედავთ“, - განაცხადა კახა კალაძემ.

ექსპერტი, ვლადიმერ ბოჟაძე აცხადებს, რომ არცერთი საკითხი, რომელიც ბანერებზე გამოაკრეს, არ შედის ადგილობრივი თვითმმართველობის ფუნქციებში.

„ჩვენ თუ გადავხედავთ პენსიონერებთან დანამატის საკითხს, ეს არის დაახლოებით 432 მილიონ ლარზე მეტი დღევანდელი პენსიონერების რაოდენობით. წარმოიდგინეთ, რა დააშავეს არათბილისელმა პენსიონერებმა და წარმოიდგინეთ ერთ დღეს, ყველა პენსიონერი თბილისელი რომ გახდეს, შეძლებს თუ არა ამას თბილისი. რაც ყველაზე მთავარია, ამ ხარჯების გაწევის დროს, ჩვენ უნდა გავაჩეროთ მთელი თბილისი. რაც შეეხება კვების საკითხებს, ეს არის ცენტრალური ხელისუფლების უფლებამოსილება და თვითმმართველობასთან საერთოდ არანაირი შეხება არ აქვს. რაც შეეხება სტუდენტებს, 5 ათასზე მეტ სტუდენტს უკვე დაუფინანსა თბილისის მერიამ სწავლა-განათლება და ეს პროექტები მომავალი 4 წლის განმავლობაშიც გაგრძელდება. ამიტომ ამომრჩეველმა ძალიან მარტივად უნდა გადაწყვიტოს - ნიკანორ მელია, ამ შემთხვევაში, ვერ ერკვევა თვითმმართველობის საკითხებში, არის უცოდინარი თუ, უბრალოდ, ცრუპენტელა და მატყუარაა“, - განაცხადა ვლადიმერ ბოჟაძემ.

ნიკა მელიას ერთ-ერთი დაპირებაა, რომ, თუ მას მერად აირჩევენ, ყოველწლიურად, 100 სტუდენტს მიეცემა შესაძლებლობა, ისწავლოს მსოფლიოს საუკეთესო უნივერსიტეტებში. ასეთი პროგრამა კი, რამდენიმე წელია, ქვეყანაში უკვე არსებობს.

„2014 წელს, შეიქმნა ცენტრი თავისი სამი პროგრამით, დღეისთვის, ცენტრს აქვს 12 პროგრამა. ამ პროგრამების გამდიდრება და რაოდენობის ზრდა სწორედ არსებულ პარტნიორებთან ერთად მოხერხდა. ჩვენ, ერთად, ამერიკის შეერთებულ შტატებთან ერთად, ვაწარმოებთ პროგრამას, რომელსაც „ფულბრაიტი“ ჰქვია. დამერწმუნეთ, ძალიან ცოტა ქვეყანაა, სადაც „ფულრაიტის“ ისეთი თანამშრომლობითი პროექტებია, რომელშიც სტიპენდიებს ორივე ქვეყნის სახელმწიფო აფინანსებს. ასევე, გვაქვს „სტიპენდიუმ უნგარიკუმის“ სასტიპენდიო პროგრამა, რომლის ფარგლებშიც, წლიურად, 80 სტუდენტამდე მიდის სასწავლებლად უნგრეთში. ესეც ორი სახელმწიფოს ერთობლივი პროექტია. ასევე, უნგრელი სტუდენტები ჩამოდიან საქართველოში. ასევე, მნიშვნელოვანია ჩვენი საფრანგეთთან თანამშრომლობის პროგრამა. უამრავი სტუდენტი სარგებლობს ერთობლივი სასტიპენდიო სქემებით. 150-ზე მეტი სტუდენტი ფინანსდება მხოლოდ ცენტრიდან“, - აცხადებს განათლების საერთაშორისო ცენტრის აღმასრულებელი დირექტორი ნინო ჭელიძე.