დავით ზალკალიანი: ხავიერ კოლომინას ვიზიტი საოკუპაციო ხაზზე ჩვენი ქვეყნის სუვერენიტეტისა და ტერიტორიული მთლიანობის მხარდაჭერის მძლავრი გზავნილი იყო

დავით ზალკალიანმა სამხრეთ კავკასიასა და ცენტრალურ აზიაში ნატოს გენერალური მდივნის სპეციალური წარმომადგენელთან შეხვედრა შეაფასა. საქართველოს ვიცე-პრემიერის თქმით, შეხვედრაზე ისაუბრეს ნატო-საქართველოს ურთიერთობის ძირითად მიმართულებებსა და სამომავლო პერსპექტივებზე, ასევე საქართველოს პროგრესზე.

„აღინიშნა, რომ ფაქტობრივად, საქართველო მოქმედებს, როგორც წევრი ქვეყანა. ამიტომ, ჩვენ უნდა დაველოდოთ იმ მომენტს, როდესაც პოლიტიკური გადაწყვეტილება იქნება მომწიფებული, რომ ქვეყანა იყოს მზად იმ მომენტისთვის. ამისთვის კიდევ ერთხელ წამახალისებელი და მხარდამჭერი გზავნილები ჩამოიტანა გენერალური მდივნის წარმომადგენელმა, რომ გავაგრძელოთ ის რეფორმები, რომლებიც თავდაცვის სფეროშია, ასევე ქვეყნის დემოკრატიზაციის კუთხით, აგრეთვე თავსებადობის გაძლიერების თვალსაზრისით და მადლიერება გამოხატა იმ წვლილისთვის, რომელიც ჩვენ შევიტანეთ ავღანეთში, ავღანეთის ოპერაციაში, ასევე, გამოსვლის დროს ერთობლივი საქმიანობით, როგორც სამხედრო კომპონენტის, ისე სამოქალაქო დანიშნულების მიმართულებით“, - განაცხადა მინისტრმა.

ზალკალიანმა ასევე აღნიშნა, რომ კოლომინას ვიზიტი საოკუპაციო ხაზთან საქართველოს სუვერენიტეტისა და ტერიტორიული მთლიანობის მხარდაჭერის სერიოზული გზავნილი იყო.

„მისი ვიზიტი საოკუპაციო ხაზზე იყო ძალიან სერიოზული, მძლავრი გზავნილი ჩვენი ქვეყნის სუვერენიტეტისა და ტერიტორიული მთლიანობის მხარდაჭერის, მიუღებლობის იმ საოკუპაციო პოლიტიკის, რომელსაც რუსეთის ფედერაცია ახორციელებს. ჩვენ ვმუშაობთ ყველა მიმართულებით. უახლოეს პერიოდში დაგეგმილია ნატოს მინისტერიალი, მომავალ წელს არის ნატოს სამიტი. მნიშვნელოვანი სამიტი იქნება და ჩვენი სურვილია, ღია კარის პოლიტიკის კონტექსტში მნიშვნელოვანი პროგრესი იყოს დაფიქსირებული საქართველოსთან მიმართებაში. ამიტომ ეს პერიოდი მაქსიმალურად უნდა გამოვიყენოთ, რათა უკვე არსებული პროგრესი გაღრმავდეს, განმტკიცდეს იმისთვის, რომ ჩვენს ნატოელ პარტნიორებს მივცეთ შესაძლებლობა მიიღონ ის გადაწყვეტილებები, რაც ჩვენს საგნობრივ, ხელშესახებ პროგრესს ასახავს შესაბამის გადაწყვეტილებებში“, - განაცხადა ზალკალიანმა.

ხავიერ კოლომინა საქართველოს რეგიონული ტურნეს ფარგლებში ეწვია. ის ოძისში საოკუპაციო ხაზთან იმყოფებოდა, რის შემდეგაც შეხვდა პრეზიდენტ სალომე ზურაბიშვილს, საგარეო საქმეთა მინისტრ დავით ზალკალიანსა და პარლამენტის თავმჯდომარე კახა კუჭავას. დაგეგმილია შეხვედრები პრემიერ ირაკლი ღარიბაშვილთან, თავდაცვის მინისტრთან, ჯუანშერ ბურჭულაძესთან და სამოქალაქო საზოგადოების წარმომადგენლებთან.