ლადო პაპავა: ყველა დავფიქრდეთ რა გვინდა, ქვეყნის განვითარება თუ ისევ დაძაბულობასა და არეულობაში ყოფნა

დღეს ძალიან არაორდინალურ სიტუაციაში ვიმყოფებით იმიტომ, რომ ადგილობრივი არჩევნები, როგორც წესი, პოლიტიკური სიმწვავით არ გამოირჩევა. მისი დატვირთვა არის ადგილობრივი თვითმმართველობის დაკომპლექტება და დაკავშირებულია რეგიონებთან, სადაც საქმე უნდა გაკეთდეს. ჩვენთან ამ ადგილობრივმა არჩევნებმა მიიღო ძალიან გადაგვარებული სახე, - ამის შესახებ ეკონომისტმა ლადო პაპავამ გადაცემა „იმედი LIVE“-ში განაცხადა.

„თავიდან ამბობდნენ, რომ ეს არჩევნები არის რეფერენდუმი. რეფერენდუმს კონსტიტუციით განსაზღვრული წესები აქვს და როცა გაგიხარდება, ვერ დანიშნავ. შარლ მიშელის დოკუმენტში დაფიქსირებული 43% გახდა საკრალური მაჩვენებელი, რომელიც ვერ უნდა გადაელახა „ქართულ ოცნებას“. სინამდვილეში მოხდა ის, რაც მოხდა და მოიპოვეს 47%. გრძელდება სულ დაძაბულობის რეჟიმში ყოფნა. ახლა ოპოზიციამ გამოაცხადა კოალიციური მთავრობა. ყველაზე კომიკური არის ის, რომ ამ კოალიციურ მთავრობაში „ქართული ოცნებისთვის“ - ყველაზე დიდი ფრაქცია ვისაც აქვს, იმისთვის ადგილი არ დატოვეს. თუ სპექტაკლს დგამდნენ, რეჟისორს ბოლომდე გაეთვალა, რომ უფრო დამაჯერებელი ყოფილიყო. ყველაფერი თვითონ არიან. მაშინ, როდესაც საკრებულოში დე ფაქტო უმრავლესობა, არჩევნების შედეგად, აქვს „ქართულ ოცნებას“, მცდელობა ექნებათ, რომ ყველაფერი ისე განვითარდეს, როგორც საპარლამენტო არჩევნების შემდეგ. სააკაშვილი დღეს საქართველოშია და დაძაბულობის მუხტი გაზრდილია, ოპოზიცია ამას შეეცდება. ყველა დავფიქრდეთ იმაზე, რა გვინდა ცხოვრებაში. გვინდა, რომ ქვეყანა ვითარდებოდეს, თუ ისევ დაძაბულობასა და არეულობაში ვიყოთ“, - განაცხადა ლადო პაპავამ.