დიმიტრი ხუნდაძე: დღეს რომ ციხეებთან მნახველების რიგი დგას, მაშინ რიგი იდგა გარდაცვლილების გამოყვანის დროს

დღეს რომ სასჯელაღსრულების დაწესებულებასთან მნახველების რიგი დგას, მაშინ რიგი იდგა გარდაცვლილების გამოყვანის დროს. ზუსტი სტატისტიკა მახსოვს: ყოველ 5 დღეში 3 გვამი გამოდიოდა ციხიდან, - ამის შესახებ ტელეკომპანია „იმედის“ გადაცემაში „იმედი LIVE“ საპარლამენტო უმრავლესობის წევრმა, დიმიტრი ხუნდაძემ განაცხადა.

„2012 წელს ფიქრადაც არ მქონდა პოლიტიკაში შემოსვლა. ვმუშაობდი სამედიცინო მიმართულებით და ჩემი პოლიტიკაში შემოსვლა განაპირობა „ნაცმოძრაობის“ სისხლიანმა კალენდარმა. პრაქტიკულად ყოველი მეორე დღე იყო უმძიმესი, სისხლიანი და მძიმედ გასახსენებელი. სანდრო გირგვლიანი, ბუტა რობაქიძე, სერგო თეთრაძე, კობა დავითაშვილი, 8 აგვისტოს მიტოვებული ჩვენი ჯარისკაცები, 7 ნოემბერი, 26 მაისი, „იმედში“ შეჭრა. სხვათა შორის, დღეს ისინი ბილწი სიტყვის თავისუფლების მოთხოვნით გამოდიან ქუჩაში, არადა სიტყვის თავისუფლებას სწორედ „იმედში“ ებრძოდნენ. როცა ამ ყველაფერს შევხედე, ვიგრძენი საფრთხე და ის, რომ მაშინ სათქმელი უნდა ეთქვათ არა მხოლოდ პოლიტიკოსებს, არამედ სხვებსაც, ვისაც არანაირი პოლიტიკური გამოცდილება არ ჰქონდა. ზუსტად ამ ვალდებულებით ჩავერთე პოლიტიკაში. დღეს რომ სასჯელაღსრულების დაწესებულებასთან მნახველების რიგი დგას, მაშინ რიგი იდგა გარდაცვლილების გამოყვანის დროს. ზუსტი სტატისტიკა მახსოვს: ყოველ 5 დღეში 3 გვამი გამოდიოდა ციხიდან. ჩვენ ეს შევცვალეთ იმით, რომ C ჰეპატიტის ელიმინაციის პროგრამა დავიწყეთ სასჯელაღსრულების სისტემიდან და შემდეგ გავავრცელეთ საზოგადოებაში. მიხეილ სააკაშვილის ბედია, რომ თავისი რეჟიმის შექმნის პირობებში არ მოხვდა ციხეში და დღეს ფაფაც კი ხელმისაწვდომია მისთვის“, - აცხადებს ხუნდაძე.

ის ასევე გამოეხმაურა მსჯავრდებულ მიხეილ სააკაშვილის ჯანმრთელობის მდგომარეობის საკითხს და აღნიშნა, რომ ექსპრეზიდენტის ჯანმრთელობის მდგომარეობა სტაბილურია.

„მე ვარ იმ ჯგუფის წევრი, რომელიც სააკაშვილზე მონიტორინგს ახორციელებს. ჩვენ ზედამხედველობას ვუწევთ ამ პროცესს. ამ ეტაპისთვის სააკაშვილის ჯანმრთელობა სტაბილურია, მით უმეტეს შიმშილობის იმ ფორმით, რა ფორმაც მან აირჩია. გარდა იმ დანამატებისა, რაც ექიმის დანიშნულებით ეძლევა მოშიმშილეს, მას აქვს თავისი დანიშნულებაც. გარეთ გამოტანილი ეს აჟიოტაჟი და სცენების დადგმა, თითქოს ვიღაც იქ სუნთქვის საშუალებას არ აძლევს, ეს გათვლილია იმაზე, რომ არეულობა მოხდეს“, - განაცხადა დიმიტრი ხუნდაძემ.