ირაკლი ქადაგიშვილი: გზების გადაკეტვას ერთადერთი მიზანი აქვს - შეაფერხონ ნორმალური ცხოვრება დედაქალაქში, ასეთი პარაზიტული გეგმა აქვთ

გზების გადაკეტვას ერთადერთი მიზანი აქვს - შეაფერხონ ნორმალური ცხოვრება დედაქალაქში და ამით საზოგადოების გარკვეული უკმაყოფილება გამოიწვიონ, - ასე აფასებს „ნაციონალური მოძრაობის“ დღევანდელ აქციას ირაკლი ქადაგიშვილი. საპარლამენტო უმრავლესობის წევრი აღნიშნავს, რომ ქალაქის პარალიზება ეკონომიკაზეც უარყოფითად მოქმედებს.

„სამოქალაქო საავადმყოფოში სააკაშვილის გადაყვანის მოთხოვნის ერთადერთი მიზეზი იყო რამენაირად მსჯავრდებული ციხიდან გამოეყვანათ. ამას, რა თქმა უნდა, ვერ აღწევენ და ახლა უნდათ ქალაქსა და ქვეყანაში უბრალოდ შექმნან ქაოსი, დისკომფორტი შეუქმნან მოსახლეობას, მაქსიმალურად გააკეთონ ის, რაც ცუდად აისახება მათ შორის ეკონომიკაზე, იმიტომ რომ, როდესაც ქალაქი პარალიზებულია, ეს ხელს არ უწყობს ეკონომიკურ საქმიანობას. ამიტომ, ვიტყოდი რომ ასეთი პარაზიტული გეგმა აქვთ, რომლითაც უნდათ რამენაირად კიდევ უფრო მეტად დააზიანონ ქვეყანა და დასტრესონ საზოგადოება და ალბათ ფიქრობენ, რომ ცუდის გამრავლება საბოლოო ჯამში მათი ზრახვების რეალიზებას შეუწყობს ხელს. ახლა აკეთებენ იმას, რომ დესტრუქციული ქმედებებით საზოგადოება მაქსიმალურად გააღიზიანონ. ეს არის ის დესტრუქციული დღის წესრიგი, რომელსაც ეს პოლიტიკური ორგანიზაცია თავისი პოლიტიკური არსებობის განმავლობაში ვერსად გაექცევა“, - აცხადებს ქადაგიშვილი.

„ნაციონალური მოძრაობის“ ორგანიზებით, მტკვრის მარჯვენა სანაპიროზე საავტომობილო მოძრაობა შეჩერებულია.