საქართველოში შრომითი უფლების შესახებ ყოველ მეხუთე გამოკითხულს სმენია

ევროკავშირისა (EU) და გაეროს განვითარების პროგრამის (UNDP) დაკვეთით ჩატარებული კვლევის მიხედვით, გამოკითხული რესპონდენტების აბსოლუტურ უმრავლესობას ადამიანის ამა თუ იმ უფლების შესახებ სმენია. კვლევის შესახებ ინფორმაციას ACT Global-ი ავრცელებს.

კვლევის მიხედვით, ყოველი 10 გამოკითხულიდან მხოლოდ ერთმა (10%) აღნიშნა, რომ ადამიანის კონკრეტული უფლებების შესახებ ლაპარაკი უჭირს, სხვებმა კი, სულ ცოტა, ერთი ასეთი უფლება დაასახელეს. კვლევამ აჩვენა, რომ ადამიანის უფლებებზე საუბრისას გამოკითხულებს ყველაზე ხშირად სიცოცხლის (38%) და თანასწორობის (35%) უფლებები ახსენდებათ (ამ მხრივ, ერთნაირი სიტუაციაა თბილისსა და სხვა ქალაქსა თუ სოფლებში).  

რესპონდენტები ასევე ასახელებენ პირადი ხელშეუხებლობის (28%) და საკუთრების უფლებებს (27%). ყოველ მეხუთე გამოკითხულს კი შრომით (21%), საარჩევნო (20%) და თავისუფალი განვითარების უფლებების (20%) შესახებ სმენია. გამოკითხულ ასაკობრივ ჯგუფებში სხვადასხვა უფლების დასახელების მაჩვენებელი სხვა ჯგუფებთან შედარებით ყველაზე დაბალია 65 წელს გადაცილებულ რესპონდენტებში.

კვლევა საქართველოს მოსახლეობის ინფორმირებულობის, ადამიანის უფლებების დაცვისა და მართლმსაჯულების ხელმისაწვდომობის შესახებ ეყრდნობა 5 ათასი პირისპირ გამოკითხვის, 14 ფოკუს ჯგუფისა და 29 ჩაღრმავებული ინტერვიუს შედეგებს. ჩაღრმავებული ინტერვიუები ჩატარდა საჯარო სექტორის, ბიზნესის, არასამთავრობო ორგანიზაციებისა და ლგბტ თემის წარმომადგენლებთან. კვლევა ჩაატარა კომპანია ACT Global-მა 2016 წლის სექტემბრიდან 2017 თებერვლამდე პერიოდში.