52%-ის აზრით, ადამიანის უფლებების დაცვაზე პასუხისმგებელი პოლიციაა

ევროკავშირისა (EU) და გაეროს განვითარების პროგრამის (UNDP) დაკვეთით ჩატარებული კვლევის მიხედვით, გამოკითხული რესპონდენტების აბსოლუტურ უმრავლესობას ადამიანის ამა თუ იმ უფლების შესახებ სმენია. კვლევის შესახებ ინფორმაციას ACT Global-ი ავრცელებს.

კვლევის ავტორები აცხადებენ, რომ საინტერესო შედეგი გამოიკვეთა. გამოკითხულთა ნახევარზე მეტი – 52% პასუხისმგებლობას ადამიანის უფლებების დაცვაზე საპატრულო პოლიციას აკისრებს, 39% კი – ზოგადად შინაგან საქმეთა სამინისტროს.

კვლევის ავტორები ამბობენ, რომ საპატრულო პოლიციის დასახელების მაღალი მაჩვენებელი შეიძლება განპირობებული იყოს იმ გარემოებით, რომ მოსახლეობას, სავარაუდოდ, საპატრულო პოლიციასთან პირადი ურთიერთობის მეტი გამოცდილება აქვს, ვიდრე შსს-ს სხვა სტრუქტურებთან და ასევე სხვა უწყებებთან.

ყოველი მესამე რესპონდენტი კი ადამიანის უფლებების დაცვას სახალხო დამცველის აპარატისგან მოელის (30%). გამოკითხულების 20%-დან 24%-მდე აღნიშნულ პასუხისმგებლობას ასევე აკისრებს პროკურატურას, საქართველოს პარლამენტს და საერთო სასამართლოებს.

კვლევის ავტორების თქმით, დასახლების ტიპის მიხედვით მნიშვნელოვანი მოსაზრებებსა და დამოკიდებულებებში სხვაობები არ შეინიშნება, თუმცა თბილისში მეტია მათი რიცხვი, ვინც ადამიანის უფლებების დაცვაზე პასუხისმგებლობას საერთო სასამართლოების სისტემას აკისრებს (29%), ვიდრე სხვა ქალაქებსა (16%) და სოფლებში (17%).

ასევე, ცნობილია იმ უფლებების ჩამონათვალი, რომლის შესახებაც გამოკითხულ მოსახლეობას ყველაზე მეტი სმენია.

კვლევა საქართველოს მოსახლეობის ინფორმირებულობა ადამიანის უფლებების დაცვისა და მართლმსაჯულების ხელმისაწვდომობის შესახებ ეყრდნობა 5 ათასი პირისპირ გამოკითხვის, 14 ფოკუს ჯგუფისა და 29 ჩაღრმავებული ინტერვიუს შედეგებს. ჩაღრმავებული ინტერვიუები ჩატარდა საჯარო სექტორის, ბიზნესის, არასამთავრობო ორგანიზაციებისა და ლგბტ თემის წარმომადგენლებთან. კვლევა ჩაატარა კომპანია ACT Global-მა 2016 წლის სექტემბრიდან 2017 თებერვლამდე პერიოდში.