ომბუდსმენს პროკურატურის მიერ სუბელიანის საქმეზე გავრცელებულ ჩანაწერზე კითხვები აქვს

სახალხო დამცველ ნინო ლომჯარიას პროკურატურის მიერ დღეს გავრცელებულ ჩანაწერთან დაკავშირებით კითხვები აქვს. ამის შესახებ ომბუდსმენმა გლდანის მერვე დაწესებულებიდან, მირზა სუბელიანის ნახვის შემდეგ თქვა. ინფორმაციას 1tv ავრცელებს.

ლომჯარიას განცხადებით, პრობლემაა, რომ დღეს სასჯელაღსრულების დაწესებულებაში ფარული მიყურადება და ჩაწერა კანონდარღვევით არის შესაძლებელი.

„ერთი რამ, რაც შემიძლია ახლავე განვაცხადო, ვისი გაკეთებულიც უნდა იყოს, რა მიზნით და როგორ, ფაქტია, რომ დღესდღეობით შესაძლებელია სასჯელაღსრულების დაწესებულებაში ხდებოდეს ფარული მიყურადება და ჩაწერა კანონის დარღვევით. ეს არის ნამდვილად პრობლემა და მიანიშნებს სასჯელაღსრულების სისტემაში არსებულ ძალიან სერიოზულ ნაკლოვანებაზე, რადგან ასეთი საუბრები, მათ შორის, სახალხო დამცველთანაც უნდა იყოს კონფიდენციალური. დღეს მათ შორის მეც მირზა სუბელიანთან შეხვედრისას არ მქონდა განცდა, რომ ეს იქნებოდა კონფიდენციალური“, – განაცხადა ნინო ლომჯარიამ.

დღეს ცნობილი გახდა, რომ მირზა სუბელიანმა გავრცელებული აუდიოჩანაწერების გამო 15 ოქტომბერს ციხეში თვითმკვლელობა სცადა.

აუდიოჩანაწერზე, რომელშიც, სავარაუდოდ, მირზა სუბელიანი ფიგურირებს, საგამოძიებო მოქმედებები 2018 წლის 12 ოქტომბერს დაიწყო. 

16 ოქტომბერს მთავარმა პროკურატურამ გამოძიების ფარგლებში მოპოვებული ერთი ჩანაწერი გამოაქვეყნა. 

მირზა სუბელიანი, ხორავას ქუჩაზე მკვლელობის საქმის ერთ-ერთი მოწმის მამაა. დანაშაულის ჩადენის დროს ის მთავარ პროკურატურაში ადამიანური რესურსების მართვის დეპარტამენტში მუშაობდა, თუმცა ამ ფაქტის გამო თანამდებობა მალევე დატოვა. ერთ-ერთი მოკლული მოზარდის დავით სარალიძის მამა სუბელიანს ბრალდებულების სასარგებლოდ საქმეში უხეშ ჩარევაში ადანაშაულებდა და მის დაპატიმრებას ითხოვდა.

9 ივნისს მირზა სუბელიანი მკვლელობის შეუტყობინებლობის ბრალდებით დააკავეს.