მამუკა მდინარაძე სააკაშვილზე: თქვენ რომ გმირად გინდათ გამოიყვანოთ, რეალურად ის არის თანამედროვეობის ანტიგმირი

იმ ყველაფრის მიუხედავად, რაც სააკაშვილმა თავისი მმართველობის ცხრა წლის განმავლობაში აკეთა, თქვენ რომ გმირად გინდათ გამოიყვანოთ, რეალურად ის არის თანამედროვეობის ანტიგმირი - განაცხადა „ქართული ოცნების“ აღმასრულებელმა მდივანმა მამუკა მდინარაძემ დღეს გამართულ ბრიფინგზე.

მისი თქმით, ამ ყველაფრის მიუხედავად, სახელმწიფო კიდევ უფრო მძიმე დანაშაულის ჩამდენი ადამიანი რომ იყოს, ზრუნავს ნებისმიერი პატიმრის სიცოცხლესა და ჯანმრთელობაზე.

„ყველა ვთანხმდებით ერთ მთავარ მორალურ პრინციპზე, რაც არ უნდა დამნაშავე იყოს და ჩვენ ვიცით, რომ მის მიმართ განაჩენიც დამდგარია, სტრასბურგის სასამართლოში გასაჩივრებული აქვთ და სტრასბურგი იტყვის საბოლოო სიტყვას მის განაჩენებთან დაკავშირებით, პიჯაკების საქმედ რომ ნათლავთ, იქ რვა მილიონის საქმეა. ბოტოქსებზე, სიგამხდრის პროცედურებზეა და უამრავ ისეთ რაღაცაზეა ლაპარაკი, რაც არანაირ მორალში არ ჯდება გარდა იმისა, რომ დანაშაულია. ამ ყველაფრის მიუხედავად და იმის მიუხედავად, რაც ამ ადამიანმა აკეთა თავისი მმართველობის ცხრა წლის განმავლობაში, თქვენ რომ გმირად გინდათ გამოიყვანოთ, რეალურად ის არის თანამედროვეობის ანტიგმირი. ამ ყველაფრის მიუხედავად, სახელმწიფო კიდევ უფრო მძიმე დანაშაულის ჩამდენი ადამიანი რომ იყოს, ზრუნავს ნებისმიერი პატიმრის სიცოცხლესა და ჯანმრთელობაზე. არაადამიანი არავინაა, რომ ვიღაცის გარდაცვალება მოუნდეს და ამაზე არათუ ილაპარაკოს, იფიქროს. მეორე მხარეა სამართლებრივი და ამ სამართლებრივთან ერთად, ვალდებულება უფლებებისა და ჯანმრთელობის დაცვის შესახებ, რასაც სახელმწიფო ზედმიწევნით შეასრულებს და ასრულებს“ - განაცხადა მამუკა მდინარაძემ.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს.პატიმრობაში მყოფმა სააკაშვილმა შიმშილობა გამოაცხადა. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვენ, იუსტიციის სამინისტრო კი აცხადებს, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.

6 ნოემბერს პენიტენციურმა სამსახურმა გაასაჯაროვა იმ პროდუქტების ამსახველი ფოტომასალა, რომლებითაც პატიმარი სააკაშვილი იკვებებოდა.

მიხეილ სააკაშვილი გლდანის მე-18 სამკურნალო დაწესებულებაში 8 ნოემბერს გადაიყვანეს.

სტრასბურგის სასამართლომ არ დააკმაყოფილა სააკაშვილის საჩივარი კერძო კლინიკაში გადაყვანასთან დაკავშირებით და შიმშილობის შეწყვეტა მოსთხოვა.

მიხეილ სააკაშვილი შიმშილობის შესაწყვეტად გარკვეულ პირობებს აყენებს.