ვლადიმერ ბოჟაძე: სააკაშვილისგან არ გვიგრძნია არანაირი თანადგომა იმ ადამიანების მიმართ, რომელთაც სიცოცხლე მოუსპო, ცხოვრება დაუმახინჯა

არა მხოლოდ 7 ნოემბერთან დაკავშირებით, ჩვენ მისგან არ გვიგრძნია არანაირი ემპათია, თანადგომა იმ ადამიანების მიმართ, რომელთაც სიცოცხლე მოუსპო, ჯანმრთელობა და ქონება წაართვა, ცხოვრება დაუმახინჯდა, - ამის შესახებ „ქრონიკაში“ ჩართვისას ვლადიმერ ბოჟაძემ განაცხადა, რომელმაც დღეს თბილისის საქალაქო სასამართლოში მიხეილ სააკაშვილის გამოსვლა შეაფასა.

ბოჟაძე დაინტერესდა, რა გააკეთა მიხეილ სააკაშვილმა, როგორც პრეზიდენტმა იმისთვის, რომ 7 ნოემბრის მოვლენები არ განვითარებულიყო.

„თუ დავეთანხმებით სააკაშვილს იმაში, რომ უგულავამ 7 ნოემბერს მოშიმშილეები მისი ბრძანებით არ დაარბია; შემდეგ მისი დავალებით ორჯერ არ დაარბიეს მათ შორის, ჯარის გამოყენებით რუსთაველის გამზირსა და რიყეზე მომიტინგეები; შემდეგ მისი ბრძანებით არ ყოფილა „იმედის“ დარბევა და შტურმით აღება და ის სამარცხვინო კადრები, რაც ყველას გვახსოვს, პირადად მე ამ მოვლენების მონაწილე ვარ, მან, როგორ პრეზიდენტმა რა გააკეთა, რომ ეს ქვეყანაში არ მომხდარიყო?! ვიცით, მის გარეშე, ადამიანები ვერცერთ ნაბიჯს ვერ დგამდნენ.

როგორ ჰგონიათ, ვინმე გონიერ ადამიანს სჯერა, რომ ის რაც 7 ნოემბერს მოხდა, სააკაშვილმა არ იცოდა და უბრალოდ ტელევიზორში უყურებდა, ნერვიულობდა, განიცდიდა თუ რა მოიმოქმედა?! ბოლოს თქვა, რომ მან პოლიტიკური გადაწყვეტილება მიიღო და გადადგა. კი არ გადადგა, ვაიძულეთ, რომ გადამდგარიყო“, - განაცხადა ბოჟაძემ.

თბილისის საქალაქო სასამართლოში 7 ნოემბრის საქმეს სამი მოსამართლის შემადგენლობით განიხილავენ. პროცესს ბრალდებული მიხეილ სააკაშვილი ესწრებოდა. მან განაცხადა, რომ პროკურატურასა და ქართულ მართლმსაჯულებას არ აღიარებს.პარალელურად, „ნაციონალური მოძრაობა“ სასამართლოს ეზოში საპროტესტო აქციას მართავს, ადგილზე მობილიზებულები არიან სამართალდამცველები.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს.

მიხეილ სააკაშვილი სამი ინსტანციის სასამართლოს განაჩენით, დამნაშავედ არის ცნობილი ვალერი გელაშვილის ცემისა და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა ექვსი წლის ვადით. ასევე, მიხეილ სააკაშვილი ბრალდებულია ტელეკომპანია „იმედის“ დარბევის, 7 ნოემბრის დარბევისა და პატარკაციშვილების ქონების უკანონოდ დაუფლებისა და სახელმწიფო დაცვის სპეციალური სამსახურის კუთვნილი 9 024 367 ლარის პირადი მიზნებისთვის გაფლანგვის ფაქტებზე.