დავით ზალკალიანი: რიგის მინისტერიალი წარმატებული იყო, რომელიც შეგვიძლია განვიხილოთ როგორც ძალიან სერიოზული ნაბიჯი ნატოს მომავალი სამიტის მომზადების კონტექსტში

საქართველოს ვიცე-პრემიერის, საგარეო საქმეთა მინისტრის განცხადებით, ქ. რიგაში გამართული მინისტერიალი წარმატებული იყო, რომელიც ჩვენ შეგვიძლია განვიხილოთ როგორც ძალიან სერიოზული ნაბიჯი ნატოს მომავალი სამიტის მომზადების კონტექსტში.

დავით ზალკალიანმა „ქრონიკაში“ რამდენიმე მომენტი აღნიშნა, რითაც დღევანდელი მინისტერიალი წარმატებული იყო.

„პირველი - ეს მინისტერიალი იყო განხილული როგორც მოსამზადებელი მომავალი წლის უაღრესად მნიშვნელოვანი მოვლენის, რაც დაკავშირებულია 2022 წლის ნატოს მადრიდის სამიტთან. მადრიდის სამიტზე აუცილებლად იქნება საუბარი საქართველოზე და ნატოს ღია კარის პოლიტიკაზე, ამის თქმის საფუძველს მაძლევს დღევანდელი დისკუსიები და ის ძალიან მრავალრიცხოვანი გამოხმაურებები, რომელიც დღეს შიდა განხილვების დროს მოვისმინეთ. დელეგაციების უმრავლესობამ აღნიშნა, რომ აუცილებელია უკრაინა და საქართველო იყვნენ წარმოდგენილი მადრიდის სამიტზე. მადრიდის სამიტი ჩვენთვის იმითაც იქნება მნიშვნელოვანი, რომ იქ დამტკიცდება ნატოს განახლებული სტრატეგია 2020-2030.

მეორე მნიშვნელოვანი მიმართულება, რომელზეც დღეს საუბარი იყო გახლავთ ის ანგარიში, რომელიც დაამტკიცა დღევანდელმა მინისტერიალმა. ეს არის ანგარიში დაკავშირებული ასპირანტ ქვეყნებთან. საქართველო განიხილება როგორც ერთ-ერთი წარმატებული ასპირანტი ქვეყანა და ამ ანგარიშში არის საუბარი რა თქმა უნდა ჩვენი პარტნიორი ნატოელი წევრი ქვეყნების ხედვებზე იმ პროგრესთან მიმართებაში, რა პროგრესიც აქვს საქართველოს ნატოში ინტეგრაციის კუთხით და ასევე არის შეფასებული ჩვენი მიდგომები და პოზიციები პრაქტიკული და პოლიტიკური ნაბიჯების გადადგმის კუთხით. ეს პრაქტიკა მრავალი წლის განმავლობაში დაპაუზებული იყო და მიხარია, რომ დღევანდელ მინისტერიალზე პრაქტიკულად განახლდა მსგავსი ტრადიცია, როდესაც ნატოელი პარტნიორები იღებენ სპეციალურ ანგარიშს ასპირანტი ქვეყნების ნატოში ინტეგრაციის პროგრესთან მიმართებაში და ვფიქრობ, რომ ესეც მნიშვნელოვანი ხელშესახები შედეგია.

კიდევ ერთი მნიშვნელოვანი მიმართულება - ჩვენი წინადადებები და ჩვენი იდეები, რომელიც წარვადგინეთ ჩვენი ნატოელი პარტნიორების წინაშე - თუ როგორ ხედავთ საქართველოს პერსპექტივიდან პოლიტიკური და პრაქტიკული ინსტრუმენტების ერთობლიობას საქართველოს ნატოში ინტეგრაციის კუთხით. ვფიქრობ, რომ ძალიან წარმატებული მინისტერიალი იყო, რომელიც ჩვენ შეგვიძლია განვიხილოთ როგორც ძალიან სერიოზული ნაბიჯი ნატოს მომავალი სამიტის მომზადების კონტექსტში“, - განაცხადა დავით ზალკალიანმა.

რიგაში, ნატოს მინისტერიალზე ასპირანტ ქვეყნებთან დაკავშირებით სპეციალური ანგარიში მიიღეს.

ნატოს საგარეო საქმეთა ორდღიანი მინისტერიალი გაიმართა. რიგაში ჩანიშნული იყო ჩრდილოატლანტიკური საბჭოს სესია, რომელზეც საქართველო და უკრაინა იყვნენ მიწვეული. ღონისძიებაზე სიტყვით დავით ზალკალიანი გამოვიდა.