კახა კალაძე რადიკალურ ოპოზიციას: გულწრფელი სურვილი მქონდა და მაქვს, რომ ამ ქალაქის განვითარებაში იყოთ ჩართულნი, თუმცა, ვხედავ, რომ თქვენ კვლავ დესტრუქციისა და ცილისწამების გზას ირჩევთ

„მას შემდეგ, რაც გუშინ, თბილისის საკრებულომ დედაქალაქის მთავრობა დაამტკიცა, სრულიად სხვა განწყობის გამოხატვა, სრულიად სხვა ტექსტის თქმა მსურდა, მაგრამ, სამწუხაროდ, ოპოზიციის დიდი ნაწილის მხრიდან ისეთივე აგრესია, სიცრუე, დესტრუქციის მცდელობა დავინახეთ, როგორსაც გასული 4 წლის განმავლობაში ვხედავდით. ალბათ, ეს მოსალოდნელიც იყო“, - ამ სიტყვებით მიმართა თბილისის მერმა საზოგადოებას, Facebook-ის ოფიციალურ გვერდზე, პირდაპირი ვიდეოჩართვისას.

კახა კალაძემ „ნაციონალური მოძრაობის“ წარმომადგენლებზე გაამახვილა ყურადღება და მათ მიმართა.

„გულწრფელი სურვილი მქონდა და მაქვს, რომ ამ ქალაქის განვითარებაში იყოთ ჩართულნი, თქვენ საზოგადოების რადიკალურ, მაგრამ მაინც განუყოფელ ნაწილს წარმოადგენთ, თუმცა, ვხედავ, რომ თქვენ კვლავ დესტრუქციის, ცილისწამების გზას ირჩევთ. თქვენ იმ გუნდის წარმომადგენლები ხართ, რომელმაც 9 წლის განმავლობაში მთელი ქვეყანა ტერორში აცხოვრა და შექმნა ვირტუალური საქართველო, თითქოს, ქვეყანაში ყველაფერი კარგად იყო და თურმე, არავინ არაფერი იცოდა იმაზე, რა ხდებოდა ციხეებში, ბიზნესთან, ქონებების წართმევებთან, ადამიანების მკვლელობებთან, გაუბედურებასთან დაკავშირებით. თქვენი მინისტრები თანამდებობებზე არაფრით მოდიოდნენ და მილიარდიანი ქონებებით გადიოდნენ პოლიტიკიდან. ამ ფულს კი, ისეთი ტრაგედიებითაც კი შოულობდნენ, როგორიც აგვისტოს ომი იყო. სამარცხვინოები ხართ. თქვენ იმ ადამიანსაც წარმოადგენთ, რომელმაც თბილისის ბიუჯეტს 48 მილიონი მოჰპარა. დღეს, მეგის ქარდავასა და თემურ უბირიას თანაგუნდელები ჩვენ გვეძახით მწამებლებს. თქვენ ის ხალხი ხართ, ვინც ამტკიცებთ, რომ თქვენს ბელად სააკაშვილს არცერთი დანაშაული არ ჩაუდენია და ციხეში ტყუილად ზის. ეს ის სააკაშვილია, რომელიც სანდრო გირგვლიანის მკვლელობაზე ჩატარებულ გამოძიებას პიარს უწოდებს და უტიფრად ამბობს, რომ არა ათასობით, მის ციხეში ნაწამები ადამიანები, არამედ თავად არის წამების მსხვერპლი. საწყალი, თურმე, საკანში ჯდომა არ შეუძლია და ეს მას თრგუნავს. აი, ასეთი უტიფარი, ურცხვი ძალის წარმომადგენლები ხართ თქვენ და, როგორც ჩანს, ყოველთვის ასეთებად დარჩებით. აი, ეს ხალხი, ჩვენგან ითხოვთ, რომ იდეალურები ვიყოთ. დიახ, ჩვენ, შეიძლება, იდეალურები არ ვართ, მაგრამ ოპტიმალურები ვართ ამ პოლიტიკურ და საზოგადოებრივ კონტექსტში“, - აღნიშნა კახა კალაძემ.