გია გაბრიჭიძე: სირცხვილია, რომ ეს კაცი პრეზიდენტი იყო, მომხრეები ჰყავს და მეორე პოლიტიკურ ძალად ითვლებიან

ნამდვილად არ მომისმენია მისი სასამართლო პროცესისთვის. დიდი ქართველი პოეტის დაკრძალვაზე ვიყავი და რასაც ახლა ინტერნეტში ვხედავ უბედურებაა, - ასე აფასებს ექსპერტი გია გაბრიჭიძე მიხეილ სააკაშვილის სასამართლო პროცესზე გამოსვლას. როგორც გაბრიჭიძე წერს, სააკაშვილის სასამართლო პროცესს უამრავი ადამიანი უყურებს და მისი გამოსვლის მოსმენა სირცხვილია.

„სააკაშვილი: გორის ჰოსპიტალთან რამდენიმე უპატრონო ძაღლი იყო. რამდენი ჩემგან დეპუტატი, ადვოკატი, ვიღაც გავიდოდა და განცხადებას აკეთებდა, ერთი ძაღლი იყო, ძალიან საყვარელი ცუგა, რომელიც ყოველთვის შედიოდა კადრში და როგორც კი ისინი განცხადებას იწყებდნენ, ის ყეფას იწყებდა. ეს იყო მისი ცხოვრებისეული ფუნქცია, რომ განცხადების გაკეთების საშუალება არ მიეცა. როცა ახალი წელი მომილოცეს და მე გადავძახე, იქაც იდგა და მახშობდა მე. ყველას სხვადასხვა ფუნქცია აქვს თავის ცხოვრებაში“.პოლიტიკური განცხადებების ჩახშობის ფუნქციას ძაღლები რადიაციული გამოსხივების შემდეგ იძენენ? ნუ რა უნდა ვთქვა? ნამდვილად არ მომისმენია მისი სასამართლო პროცესისთვის. დიდი ქართველი პოეტის დაკრძალვაზე ვიყავი და რასაც ახლა ინტერნეტში ვხედავ უბედურებაა. ჩვენს თავზე მოხვეული უბედურება. მინდა ვთხოვო ხელისუფლებას რაც შეიძლება მცირე დოზით იყოს საჯარო სასამართლო პროცესი. სირცხვილია. უამრავი ხალხი როგორც საქართველოს მოქალაქე, ასევე უცხოელი ნებსით, თუ უნებურად უყურებს და სირცხვილია. სირცხვილია რომ ეს კაცი პრეზიდენტი იყო, რომ მომხრეები ჰყავს და მეორე პოლიტიკურ ძალად ითვლებიან. სირცხვილია”, - წერს ექსპერტი Facebook-ზე.

დღეს სასამართლო მიხეილ სააკაშვილის მიერ საზღვრის უკანონოდ კვეთის საქმეს განიხილავს. პროცესს ბრალდებული ყოფილი პრეზიდენტიც დაესწრო და სიტყვით გამოვიდა.

საქართველოს ყოფილი პრეზიდენტი 1-ელ ოქტომბერს დააკავეს.

შინაგან საქმეთა სამინისტროს ინფორმაციით, მსჯავრდებული, უკრაინის მოქალაქე მიხეილ სააკაშვილის მიერ საქართველოს საზღვრის უკანონო გადაკვეთის, ორგანიზებული ჯგუფის მიერ საქართველოს სახელმწიფო საზღვარზე მიგრანტის უკანონოდ გადაყვანისა და მძიმე დანაშაულის წინასწარ შეუპირებლად დაფარვის ფაქტებზე გამოძიება საქართველოს სისხლის სამართლის კოდექსის 344-ე მუხლის 1-ლი ნაწილით, 344-ე პრიმა მუხლის მესამე ნაწილის „ა“ ქვეპუნქტით და 375-ე მუხლის მე-2 ნაწილით მიმდინარეობს. ბინის მეპატრონეს, სადაც მიხეილ სააკაშვილი იმყოფებოდა, საქართველოს პროკურატურამ ბრალი 3 ოქტომბერს წარუდგინა, შემდეგ კი ელგუჯა ცომაიას აღკვეთ ღონისძიებად პატიმრობა შეეფარდა. 4 ოქტომბერს პოლიციამ, მიხეილ სააკაშვილის საქმის გამოძიების ფარგლებში, დანაშაულის დაფარვის ბრალდებით კიდევ 2 პირი დააკავა. სახელმწიფო ბრალდების მიერ, ლორთქიფანიძის შესახებ გავრცელებული ინფორმაცია იხილეთ ამ ბმულზე.