პარლამენტის უფრაქციო წევრთა მიერ მომზადებულ, უკრაინის მხარდამჭერ რეზოლუციის პროექტს ავტორები უკან გაითხოვენ

პარლამენტის საგარეო ურთიერთობათა კომიტეტს უკრაინაში მიმდინარე მოვლენების შესახებ უფრაქციო პარლამენტის წევრების მიერ მომზადებული საქართველოს პარლამენტის რეზოლუციის პროექტი უნდა განეხილა, თუმცა, პროექტის ავტორებმა სხდომაზე, საკუთარი პროექტის გაწვევა გადაწყვიტეს და მმართველ პარტიას ერთი, მრავალპარტიული რეზოლუციის მიღებისკენ მოუწოდეს.

როგორც პარლამენტის წევრმა მიხეილ დაუშვილმა განაცხადა, რეზოლუციის პროექტის გამოთხოვის პროცედურას დღესვე დაიწყებენ.

„ბოლო თვეების განმავლობაში, რუსეთის ფედერაცია, უკრაინის საზღვრებთან, მსხვილ საბრძოლო შენაერთებს, სამხედრო ტექნიკას განალაგებს და რეალურად, ფართომაშტაბიანი სამხედრო აგრესიით პირდაპირ იმუქრება. რაც დღეს უკრაინასთან დაკავშირებით ხდება, არის მეორე მსოფლიო ომის შემდგომ სამხედრო მოქმედებების პოტენციური მასშტაბით, უპრეცედენტო გეოპოლიტიკური კრიზისი, რომელიც პირდაპირ ემუქრება არა მხოლოდ უკრაინის, არამედ ფართო შავი ზღვის რეგიონსა და ევროპის უსაფრთხოებას. შესაბამისად, დღეს საქართველოს მიერ მეგობარი და სტრატეგიული მოკავშირის - უკრაინის მხარდაჭერა არის კრიტიკულად მნიშვნელოვანი არა მხოლოდ უკრაინისთვის, არამედ, საქართველოს ეროვნული უსაფრთხოებისთვის, სუვერენიტეტისთვის, დამოუკიდებლობისა და დემოკრატიული განვითარებისთვის, ვინაიდან რუსეთი ემუქრება არა მხოლოდ უკრაინას, არამედ - საქართველოსაც. რუსეთი ითხოვს დასავლეთისგან გარანტიებს, რომ უკრაინა და საქართველო არ გახდებიან ჩრდილოატლანტიკური კავშირის წევრი სახელმწიფოები. ეს ნიშნავს, რომ რეალურად, რუსეთი ჩვენ გარეშე იღებს გადაწყვეტილებას იმასთან დაკავშირებით, რომ გავხდეთ დასავლური ოჯახის ნაწილი, რაც მიუღებელი და დაუშვებელია. ამით ის პირდაპირ დარტყმას აყენებს ჩვენს სუვერენიტეტსა და დამოუკიდებლობას. სწორედ ამიტომ, დღევანდელი საფრთხე არ არის მხოლოდ უკრაინის გამოწვევა, ეს არის საქართველოს გამოწვევაც, რომელსაც ადეკვატური პასუხი სჭირდება. გვესმის, რომ არც პოლიტიკური მზაობა და არც რესურსი არ არსებობს იმისთვის, რომ უკრაინის სამხედრო-ტექნიკურ მხარდაჭერაზე ვისაუბროთ, თუმცა, აუცილებელია, რომ საქართველომ გამოხატოს სრულფასოვანი პოლიტიკური მხარდაჭერა უკრაინელი ხალხის სასარგებლოდ. უკრაინის მხარდაჭერა არის ზეპარტიული საკითხი და არ არის მიზანშეწონილი, რომ დღეს ჩვენ პარლამენტში ორი რეზოლუციის პროექტს ვიხილავდეთ. აქედან გამომდინარე, ჩვენ, ჩვენი რეზოლუციის ნაწილში, გამოთხოვის პროცედურას ვახორციელებთ და იმედს ვიტოვებთ, რომ „ქართულ ოცნებას“ ეყოფა გამბედაობა, ოკუპანტს უწოდებს ოკუპანტს და უკრაინას გამოუცხადებს სათანადო პოლიტიკურ მხარდაჭერას,“ - განაცხადა მიხეილ დაუშვილმა.