არჩილ თალაკვაძე: სააკაშვილის დანაშაულებთან დაკავშირებით ყველაფერი ხელის გულზეა, გამოძიებულია, დადგენილი აქვს სამივე ინსტანციის სასამართლოს, რომ ეს ადამიანი მძიმე დანაშაულებში არის მხილებული

ეს არის მცდელობა, რომ როგორმე გაამართლონ პარლამენტში დაბრუნება, იმიტომ რომ მათ არ შეუძლიათ თავიანთ მხარდამჭერებს პირდაპირ უთხრან, რომ შედიან პარლამენტში. მათ ეს შემოვლითი გზები სჭირდებათ, იმიტომ რომ თვეების განმავლობაში ზუსტად საპირისპიროს უმტკიცებდნენ თავიანთ მხარდამჭერებს, - განაცხადა საპარლამენტო უმრავლესობის წევრმა არჩილ თალაკვაძემ „ქრონიკაში“, რითაც გამოეხმაურა სააკაშვილი საქმეზე დროებითი საგამოძიებო კომისიის შექმნის საკითხს. მისი თქმით, ყოფილი პრეზიდენტის საქმეში გამოსაძიებელი არაფერია, რადგან ყველაფერი „ხელის გულზე დევს“.

„პარლამენტს აქვს გაცილებით მნიშვნელოვანი საკითხები და საკანონმდებლო პროექტები განსახილველი. ეს იყო მორიგი ინიციატივა და განცხადება, რაც ჩვენ ოპოზიციის მხრიდან მოვისმინეთ. არაერთი მოგვისმენია მანამდეც, რომ რაღაც საგამოძიებო კომისიებს ქმნიდნენ ამა თუ იმ საკითხზე, თუმცა ვერც ერთი მათი ინიციატივა ვერ ვნახეთ ჩვენ თანმიმდევრულად ბოლომდე მიყვანილი. კითხვები, რომ „ქართული ოცნება“ დაუჭერს თუ არა ამ კომისიას მხარს, რელევანტური არ არის, იმიტომ, რომ მოგეხსენებათ საკონსტიტუციო რეფორმის შემდეგ ჩვენ რეგლამენტის რეფორმაც ჩავატარეთ და რეგლამენტი აძლევს საშუალებას ოპოზიციის ამ რაოდენობას, რომ შექმნან კომისია, თუ მათ მართლაც უნდათ რაიმეს გამოკვლევა, მაგრამ მიხეილ სააკაშვილის დანაშაულებთან დაკავშირებით ყველაფერი ხელის გულზეა, გამოძიებულია, დადგენილი აქვს სამივე ინსტანციის სასამართლოს, რომ ეს ადამიანი მძიმე დანაშაულებში არის მხილებული და მეტსაც გეტყვით, სტრასბურგის სასამართლოსაც კი განხილული აქვს ეს თემა და ნათქვამი აქვს, მაგალითად გირგვლიანის საქმეში როგორც მაშინდელი პრეზიდენტი და მთელი მისი ადმინისტრაციული ვერტიკალი იყვნენ ჩართულნი უმძიმეს კანონდარღვევებში, რაც ამ საქმეშია. ამიტომ, რაც შეეხება მის ბრალეულობას და მტავარ სისხლის სამართლის საქმეებს, აქ ვფიქრობ გამოსაძიებელიც არაფერია. თუ მათ აინტერესებთ საზღვრის კვეთასთან დაკავშირებული საქმე, ესეც განხილვაშია და აქაც საკმაოდ პირდაპირი არგუმენტები და მტკიცებულებები დევს საქმეში და ჩვენ ყველამ ვნახეთ, რომ ის მართლაც უკანონო გზით შემოვიდა ქვეყანაში. ასე რომ, მე პირდაპირ გეტყვით, რომ ეს არის მცდელობა, რომ როგორმე გაამართლონ პარლამენტში დაბრუნება, იმიტომ რომ მათ არ შეუძლიათ თავიანთ მხარდამჭერებს პირდაპირ უთხრან, რომ შედიან პარლამენტში. მათ ეს შემოვლითი გზები სჭირდებათ, იმიტომ რომ თვეების განმავლობაში ზუსტად საპირისპიროს უმტკიცებდნენ თავიანთ მხარდამჭერებს“, - განაცხადა თალაკვაძემ.

ბიუროს სხდომაზე მიხეილ სააკაშვილის საქმეზე დროებითი საგამოძიებო კომისიის შექმნის მოთხოვნით პარლამენტის დადგენილების პროექტი დაინიცირდა.