ნატალია გალიბარენკო: უკრაინას საქართველოსთან ერთად აქვს პირობა ბუქარესტის სამიტიდან, რომ ორივე ქვეყანა გახდება ჩრდილოატლანტიკური ალიანსის წევრი

უკრაინას საქართველოსთან ერთად აქვს პირობა ბუქარესტის სამიტიდან, რომ ორივე ქვეყანა გახდება ჩრდილოატლანტიკური ალიანსის წევრი და ამ გზაზე მაპი იქნება ლოგიკური ნაბიჯი ყველაფერი ძალაშია, - ამის შესახებ უკრაინის ელჩმა ნატოში, ნატალია გალიბარენკომ „ქრონიკას“ განუცხადა.

მისი თქმით, უკრაინის ნატოში გაწევრიანება ქვეყნის კონსტიტუციაშია ასახული.

„ეს არის სახელმწიფოს საგარეო პოლიტიკის მთავარი პრიორიტეტი. უკრაინას საქართველოსთან ერთად აქვს პირობა ბუქარესტის სამიტიდან, რომ ორივე ქვეყანა გახდება ჩრდილოატლანტიკური ალიანსის წევრი და ამ გზაზე მაპი იქნება ლოგიკური ნაბიჯი. ყველაფერი ძალაშია, ორგანიზაციის წევრები ამ პირობის ერთგულებას ადასტურებენ. საქართველომ და უკრაინამ უნდა გაატარონ რეფორმები, მოემზადონ ნატოს წევრობისთვის და პოლიტიკური გადაწყვეტილების დრო მოვა. ჩრდილოატლანტიკურ ალიანსში გასაწევრიანებლად პოლიტიკური გადაწყვეტილება და კონსენსუსია საჭირო. უკრაინისთვის ნატოში წევრობის გადახედვა მოლაპარაკებებს არ ექვემდებარება. უკრაინის პრეზიდენტმა მკაფიოდ განაცხადა, რომ უკრაინას ნატოს წევრობა სურს. ამ პოზიციაზე გავლენას ვერაფერი მოახდენს. რუსეთი სულ ეჭვიანობს უკრაინის ევროპული და ევროატლანტიკური ინტეგრაციის გამო და მოსკოვში სურთ პირობის მიღება, რომ ნატოს გაფართოება უკრაინასა და საქართველოს არ შეეხება, მაგრამ ეს არ მოხდება ნატოს პირობა ძალაშია“, - განაცხადა ნატალია გალიბარენკომ .