მამუკა მდინარაძე: ბადრი ჯაფარიძე იქნება „ნაცმოძრაობის“ კანდიდატი, სხვაგვარად წარმოუდგენელია, ერთადერთი თუ ამ ბრძოლაში ისევ შემოვა ბრინჯაოს გიორგით წოდებული გახარია, რომელიც სულ ბრინჯაოს მედლისთვის იბრძვის

ჩვენ შეგვიძლია წარმოვიდგინოთ, რომ ბადრი ჯაფარიძე იქნება „ნაცმოძრაობის“ კანდიდატი, სხვაგვარად წარმოუდგენელია, ერთადერთი, თუ ამ ბრძოლაში ისევ შემოვა ბრინჯაოს გიორგით წოდებული გახარია, რომელიც სულ ბრინჯაოს მედლისთვის იბრძვის, - ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ ჟურნალისტებს განუცხადა.

მისი თქმით, ჯაფარიძის პარტია „ლელო“ „ნაცმოძრაობის“ დანამატია და შესაძლოა, გარკვეული ელექტორატი ამის გამო „ნაცმოძრაობას“ მოაკლდეს.

„ყველა შემთხვევაში ბადრი ჯაფარიძის დაყენება „ქართული ოცნების“ კანდიდატის კონკურენტად მათთვის პრაგმატულადაც კი ძალიან წამგებიანია, იქედან გამომდინარე, რომ ადამიანი დამნაშავედ იყო ცნობილი და ამის შემდეგ გარდაბნელებსა და რუსთაველებს ის კანდიდატად შესთავაზეს. მათ რამდენი დამნაშავე კანდიდატი უნდა შესთავაზონ?! გახსოვთ ხომ, რამდენ რაიონში დააყენეს მათ დამნაშავე კანდიდატები. ჩვენი შეფასებით კი არა, სასამართლოს მიერ კანონიერ ძალაში შესული განაჩენით დამნაშავედ ცნობილ პირებს ასე პერმანენტულად კანდიდატებად აყენებენ-ხოლმე, რითაც სერიოზულ შეურაცხყოფას აყენებენ იმ კონკრეტული მუნიციპალიტეტის ამომრჩეველსა და საზოგადოებას, სადაც ეს ადამიანები მათი მხრიდან კანდიდატებად დგებიან-ხოლმე“, - განაცხადა მდინარაძემ.

მისივე თქმით, შესაბამისად, ბადრი ჯაფარიძე „ნაცმოძრაობის“ კანდიდატი იქნება. მდინარაძემ ასევე ისაუბრა ამ პროცესში გიორგი გახარიას როლზე.

„ჩვენ შეგვიძლია წარმოვიდგინოთ, რომ ბადრი ჯაფარიძე იქნება „ნაცმოძრაობის“ კანდიდატი, სხვაგვარად წარმოუდგენელია. ერთადერთი თუ ამ ბრძოლაში ისევ შემოვა ბრინჯაოს გიორგით წოდებული გახარია, რომელიც სულ ბრინჯაოს მედლისთვის იბრძვის, რადგან როგორმე მეორე ტურში გადაიყვანოს „ნაცმოძრაობის“ კანდიდატი. ამ შემთხვევაში შესაძლოა, ეს ამბავი უფრო საინტერესო გახდეს. მათი მხრიდან „ნაცმოძრაობის“ მხარდამჭერი პოლიტიკა ძალიან გაშიშვლდა. გულწრფელად გეუბნებით, ის 2-3%, რომელიც გახარიას ანგარიშზეა დარჩენილი, მისი ელექტორალური მხარდაჭერა შეიძლება იყოს, ცოტა უხერხულობაა ჩვენთვის. ახლა ერთადერთი ინტრიგა რჩება, შემოვარდება თუ არა ამ თამაშში ბრინჯაოს მედლისთვის მებრძოლი გახარია. ყველაფერი წინასწარ არის გადაწყვეტილი, ვინაიდან შეუძლებელია ირაკლი შატაკიშვილს გარდაბნის ისტორიულ სოფლებსა და რუსთავში მოუგოს „ნაცმოძრაობის“ კანდიდატმა, მითუმეტეს, თუ ეს იქნება სასამართლოს მიერ დამნაშავედ ცნობილი ბადრი ჯაფარიძე“, - განაცხადა მდინარაძემ.