ლევან ნიკოლეიშვილი: რუსეთმა უნდა მიიღოს ისეთი პასუხი, რაც მას დააფიქრებს, რომ ასეთი ქმედებები მიზანშეწონილი არ არის - შეშფოთება, აღშფოთება არ არის ის, რაც აიძულებს რუსეთს რომ გაჩერდეს

რუსეთი რომ გაჩერდეს, ამისათვის მან უნდა მიიღოს სწორედ ისეთი პასუხი, რაც მას დააფიქრებს, რომ ასეთი ქმედებები მიზანშეწონილი არ არის. საბოლოოდ შეიძლება რუსეთი აღმოჩნდეს გარიყული ქვეყანა. პუტინზე უფრო ძლიერ ლიდერებს დაუხევიათ უკან სხვადასხვა პოლიტიკური მიზეზებიდან გამომდინარე. თუ ასეთი ქმედებები განხორციელდება, ის გაჩერდება, - ამის შესახებ ანალიტიკოსმა, ლევან ნიკოლეიშვილმა „ქრონიკაში“ განაცხადა.

მისი თქმით, სიტყვა შეშფოთება, აღშფოთება, გარკვეული ჰუმანიტარული დახმარებები არ არის ის, რაც აიძულებს რუსეთს რომ გაჩერდეს.

„ყველაზე მთავარია, რამდენად ძლიერ პოზიციას დაიკავებს უკრაინის ხელისუფლება უკრაინის საზოგადოებასთან, რამდენად შეკრული იქნება მთლიანად ერი და ბერი და რამდენად ადეკვატური იქნება მხარდაჭერა დასავლეთიდან. სიტყვა შეშფოთება, აღშფოთება, გარკვეული ჰუმანიტარული დახმარებები არ არის ის, რაც აიძულებს რუსეთს რომ გაჩერდეს“, - განაცხადა ლევან ნიკოლეიშვილმა.

მისი თქმით, გარკვეულ ელიტაზე სანქციების დაწესება, მილანში ვაჭრობისა თუ შოპინგის აკრძალვა ეს არის ის ბერკეტი, რაც ახლა საჭიროა.

„რუსი მებრძოლი ჯარისკაცი, რომელიც ტანკში ზის (ყოველგვარი შეურაცხყოფის გარეშე მინდა ვთქვა) მან შეიძლება საერთოდ არ იცოდეს მილანი სად არის. ამიტომ მას უნდა შეეხოს ბერკეტები და უნდა დაფიქრდეს, რომ მისი ხელმძღვანელობა რასაც აკეთებს, არ არის სწორი. რუსეთშიც არიან გარკვეული ძალები, რომლებსაც არ მოსწონთ ის ქმედებები, რასაც პუტინი ახორციელებს. ეს ყველაფერი ერთიანობაში ისე უნდა შეიკრას, რომ აიძულოს პუტინი შეცვალოს თავისი გადაწყვეტილება“, - განაცხადა ლევან ნიკოლეიშვილმა.

ვლადიმერ პუტინმა დონბასში „სპეციალური სამხედრო ოპერაციის“ ჩატარების გადაწყვეტილება მიიღო.

ვოლოდიმირ ზელენსკიმ უკრაინაში საომარი მდგომარეობა გამოაცხადა.