უკრაინაში საქართველოს ელჩი: ჩვენი მოქალაქეებისთვის მოწოდებაა, დარჩნენ სახლში და საყვირის ხმაზე ჩავიდნენ თავშესაფარში, თავი შეიკავონ საზღვრების მიმართულებით გადაადგილებისგან

ჩვენი მოქალაქეებისთვის მოწოდებაა, რომ დარჩნენ სახლში და როდესაც საყვირის ხმაა, ჩავიდნენ თავშესაფარში. თავი შეიკავონ გადაადგილებისგან საზღვრების მიმართულებით, რადგან გადატვირთულია როგორც ქალაქიდან გასასვლელი გზები, ასევე გამშვებ პუნქტებთან მისასვლელ გზებზე არის უზარმაზარი საცობები, - ამის შესახებ „ქრონიკას“ უკრაინაში საქართველოს ელჩმა, გიორგი ზაქარაშვილმა განუცხადა, რომელმაც უკრაინაში საქართველოს მოქალაქეების მიმართ რეკომენდაციებზე ისაუბრა.

მისი თქმით, დღეს საუკეთესო გამოსავალია სახლში ყოფნა და დამორჩილება იმ მოწოდებების, რომელსაც უკრაინის ხელისუფლება აკეთებს.

„ვართ კიევში, საელჩოში, როგორც პოლიტიკური ნაწილი, ასევე საკონსულოც მუშაობს, ცხადია საგანგებო რეჟიმში. პირველ ყოვლისა, ვემორჩილებით უკრაინის ხელისუფლების მოწოდებებს, მათ შორის იმას, რომ ვიყოთ სახლში და როგორც კი განგაშია ჩავიდეთ თავშესაფარში. იმედია, ეს დიდხანს არ გაგრძელდება და უკრაინა გაიმარჯვებს. შესაბამისად, ჩვენი მოქალაქეებისთვის მოწოდებაა, რომ დარჩნენ სახლში და როდესაც საყვირის ხმაა, ჩავიდნენ თავშესაფარში. თავი შეიკავონ საზღვრების მიმართულებით გადაადგილებისგან, რადგან გადატვირთულია როგორც ქალაქიდან გასასვლელი გზები, ასევე გამშვებ პუნქტებთან მისასვლელ გზებზე არის უზარმაზარი საცობები. შეტევა არის სხვადასხვა მიმართულებიდან, ამიტომ იმის გარანტია, რომ ვთქვათ, კიევიდან ლვოვამდე მოხერხდება გადაადგილება ადეკვატურად, ამის გარანტიაც არ არის. კიდევ ვიმეორებ, დღეს საუკეთესო გამოსავალია სახლში ყოფნა და იმ მოწოდებების დამორჩილება, რომელსაც უკრაინის ხელისუფლება აკეთებს“, - გიორგი ზაქარაშვილმა.​

რუსეთი უკრაინის ტერიტორიაზე 24 თებერვალს შეიჭრა, რის შემდეგაც პრეზიდენტმა, ვოლოდიმირ ზელენსკიმ უკრაინაში საომარი მდგომარეობა გამოაცხადა.