მიხეილ სარჯველაძე დანილოვის განცხადებაზე: არავითარი გამართლება და მიზეზი არ შეიძლება ჰქონდეს საქართველოსთვის ახლა ომის დაწყების მოწოდებას

საპარლამენტო უმრავლესობის წევრი, მიხეილ სარჯველაძე უკრაინის ეროვნული უსაფრთხოებისა და თავდაცვის საბჭოს მდივნის, ალექსეი დანილოვის განცხადებას გამოეხმაურა. როგორც დეპუტატმა განაცხადა, არავითარი გამართლება და მიზეზი არ შეიძლება ჰქონდეს საქართველოსთვის ახლა ომის დაწყების მოწოდებას.

„სასიამოვნო შთაბეჭდილება ამ განცხადებამ არ დატოვა რამდენიმე მიზეზის გამო. ისე ჩანს, რომ ეს არის ერთგვარად ანტიდასავლური განცხადება იმ თვალსაზრისით, რომ არ მგონია, მშვიდობის აღსადგენად რამენაირად სასარგებლო აღმოჩნდეს ასეთი ტიპის განცხადებები, მოწოდებები და მით უმეტეს განვითარება მოვლენების იმ ხაზის მიხედვით, რასაც უშიშროების საბჭოს მაღალჩინოსანი აკეთებს.

ამ შემთხვევაში რეალური მიზეზი უკმაყოფილებისა არა სანქციები და განცხადებები იყო, არამედ როგორც ჩანს, მოტივაცია სწორედ ამას უკავშირდებოდა, რომ იქნებ რამენაირად საქართველო ჩაერთოს სამხედრო ავანტიურაში და ამ გზით თითქოს რაიმე დახმარება აღმოუჩინოს უკრაინას. ძალიან მნიშვნელოვანია ითქვას, რომ არავითარ დახმარებას ეს არ გამოიწვევს უკრაინისთვის, ეს არასწორია. მეორე, რაც მნიშვნელოვანია, არავითარი გამართლება და მიზეზი არ შეიძლება ჰქონდეს საქართველოსთვის ახლა ომის დაწყების მოწოდებას. ეს ნამდვილად არ არის საქართველოს ინტერესში. რასაც ვამბობდით მთელი ამ დროის განმავლობაში მათ შორის რეალურ მოტივაციასთან დაკავშირებით ზოგიერთი უკრაინელი მაღალჩინოსნისა ან მაგალითად საქართველოში მოქმედი ისეთი პარტიებისა, რომელსაც ჩვენ ვუწოდეთ ომის პარტია, დღეს როგორც ირკვევა აბსოლუტურად სამართლიანად, ლოგიკურად და მართებულად, მათი რეალური მოტივაცია როდესაც გვაკრიტიკებდნენ ცალკეულ გამონათქვამებთან დაკავშირებით, ირკვევა, რომ არაფერი დაეწუნებოდა საქართველოს არც სანქციებთან დაკავშირებით, არც ერთ სხვა საკითხებთან. უბრალოდ, მოტივაცია რაც იყო, ამას შეიძლება ვერ იძახდნენ ხმამაღლა და ახლა დადასტურდა, რომ ჰქონდათ მოტივაცია, საქართველოში გაჩაღდეს ომი, ამისთვის მუშაობდნენ, ამისთვის იღვწოდნენ და სამწუხაროდ, მხარდამჭერები ჰყავდათ უკრაინის ხელისუფლებაში როგორც ჩანს. რეალურად, არავითარი დახმარება, შეღავათი ეს უკრაინისთვის რეალურად არ იქნება. ომის გაფართოება, ფრონტების გახსნა და ესკალაცია არც ერთ შემთვევაში მშვიდობიანი სამყაროსთვის არ არის სასურველი. ამას ქადაგებს ნატო-ს არაერთი მაღალჩინოსანი, არაერთი ევროპული სახელმწიფო, ეს განცხადება ერთგვარად შეიცავს შეტევას ანტიდასავლური განწყობების“, – განაცხადა სარჯველაძემ.

უკრაინის უშიშროების საბჭოს მდივანმა განაცხადა: „დნესტრისპირეთი, საქართველო და ყველა დაკავებული რომ იყვნენ საკუთარი ტერიტორიების დაბრუნებით, ეს აუცილებლად დაგვეხმარებოდა“.