ცესკო: ბათუმში ელექტრონული ტექნოლოგიების საპილოტე პროექტი წარმატებულად მიმდინარეობს და ამ საკითხით მანიპულირების მცდელობა საარჩევნო პროცესს ვერ დააზიანებს

ცენტრალური საარჩევნო კომისიის ინფორმაციით, კენჭისყრის პროცესი გრძელდება და საარჩევნო უბნებზე კანონმდებლობის სრული დაცვით, მაღალპროფესიულ დონეზე ემსახურებიან საუბნო საარჩევნო კომისიების წევრები ამომრჩევლებს.

„აქვე აუცილებლად მიგვაჩნია გამოვეხმაუროთ არასწორ და მანიპულაციურ ინფორმაციას, რომელიც საზოგადოების შეცდომაში შეყვანას ისახავს მიზნად. კერძოდ, ნაციონალური მოძრაობის წარმომადგენლის მიერ გავრცელებული არასწორი და მანიპულაციური ინფორმაციის მიხედვით საარჩევნო ბიულეტენის ჩარჩო ფორმაზე კონკრეტული პარტიის მხარდასაჭერად მინიშნებაა გაკეთებული.

ბათუმში ხმის მიცემის პროცედურა ელექტრონული აპარატით ხორციელდება და უკვე შევსებული ბიულეტენი საარჩევნო ყუთში მოთავსებამდე ჩარჩო ფორმაში იდება. აღნიშნულ ჩარჩო ფორმაზე დატანილია სტანდარტული ინსტრუქცია ამომრჩევლისთვის თუ როგორ უნდა გააფერადოს მისთვის სასურველი კანდიდატის წინ არსებული წრე. ნიმუშად მოცემულია ცარიელი და შევსებული წრეები, გაფერადებულია მეორე წრე. ამ ჩარჩო ფორმას და ინსტრუქციას იყენებენ პირდაპირი მანიპულაციისთვის.

თუ კარგად დავაკვირდებით, მოკლე ინფორმაცია თუ როგორ უნდა გააფერადოს ამომრჩეველმა წრე, უშუალოდ საარჩევნო ბიულეტენის ზედა ნაწილშიც არის განთავსებული, სადაც ნიმუშად პირველი წრეა გაფერადებული. ასე რომ, ფაქტია, არანაირ სააგიტაციო მინიშნებას არც ჩარჩო ფორმაზე და არც ბიულეტენზე ადგილი არ აქვს. ამ საკითხზე აპელირება არის გაუმართლებელი და წარმოადგენს საარჩევნო პროცესის დაზიანების მცდელობას, შეჰყავს საზოგადოება შეცდომაში და ასევე ემსახურება საარჩევნო ადმინისტრაციის მიმართ ნდობის შემცირებას.

მოვუწოდებთ ჩართულ მხარეებს, ნუ გაავრცელებენ გადაუმოწმებელ და არასწორად ინტერპრეტირებულ ინფორმაციას, ნუ გასცდებიან საკუთარი უფლებამოსილების ფარგლებს. არ შეუშალონ ხელი საარჩევნო კომისიების მუშაობას, ხელი შეუწყონ საარჩევნო ადმინისტრაციას მშვიდად წარმართოს საქმიანობა, რათა ზუსტად აისახოს თითოეული ამომრჩევლის ნება.
ელექტრონული ხმის მიცემისა და დათვლის პროცესი არის ცესკოს უკვე წარმატებული საპილოტე პროექტი, და წელს კიდევ ერთი ახალი კომპონენტი დაემატა და როგორც უკვე აღვნიშნეთ ეს არის ელექტრონული ვერიფიკაციის აპარატები. ასეთი ტექნოლოგიების პილოტირება და დანერგვის შესაძლებლობების განხილვა კი მხოლოდ საარჩევნო პროცესის განვითარებას და შესაბამისად დემოკრატიული პროცესების ხელშეწყობას ისახავს მიზნად.

ახლა კი გაგაცნობთ ინფორმაციას კენჭისყრის დღის მიმდინარეობასთან დაკავშირებით. ამ დროისთვის საარჩევნო უბნებზე ხმის მიცემის პროცესი მშვიდ ვითარებაში მიმდინარეობს. ამომრჩევლებს აქვთ შესაძლებლობა, თავისუფლად, ყოველგვარი დაბრკოლების გარეშე განახორციელონ კონსტიტუციური უფლება და გამოხატონ საკუთარი ნება.

წარმოგიდგენთ ამომრჩეველთა აქტივობას 12:00 საათისთვის შუალედურ არჩევნებზე მივიდა სულ 19 610 ამომრჩეველი, რაც ამომრჩეველთა საერთო რაოდენობის 12,2%-ია. ბათუმში 12:00 საათისთვის საარჩევნო უბნებზე მივიდა 3 872 ამომრჩეველი (18,8%); ხოლო რუსთავსა და გარდაბანში - 15 738 (11.2%).

საარჩევნო ადმინისტრაცია უზრუნველყოფს არჩევნების სანდოობის მაღალ ხარისხს და გამჭვირვალე გარემოს. ამ მიზნით საარჩევნო უბნებზე განთავსებულია ხმის მიცემის მოდიფიცირებული კაბინები, რომელიც პირველად მუნიციპალიტეტის ორგანოთა არჩევნებზე იყო გამოყენებული. კაბინები წინა მხრიდან ამოჭრილია, ისე რომ უზრუნველყოფილი იყოს ხმის მიცემის პროცესის ფარულობა. გახსოვდეთ, რომ ხმის მიცემა ფარულია და კენჭისყრის ფარულობის უზრუნველსაყოფად აკრძალულია კენჭისყრის კაბინაში ფოტო და ვიდეოგადაღება. მოვუწოდებთ ამომრჩევლებს იაქტიურონ, მივიდნენ საარჩევნო უბნებზე და გააკეთონ საკუთარი არჩევანი. აქვე, მინდა შევახსენო ამომრჩევლებს, საარჩევნო სიაში საკუთარი და ოჯახის წევრების მონაცემების გადამოწმების, ასევე საარჩევნო უბნის დეტალური მისამართის გასაგებად შეუძლიათ ისარგებლონ ცესკოს ვებგვერდით - cesko.ge. ინფორმაციის მიღება ასევე შეუძლიათ ცესკოს კონტაქტ-ჰაბში, რომელიც დღეს უწყვეტად მუშაობს - ტელეფონის ნომერია - 2 51 00 51;

ასევე რამდენიმე საარჩევნო უბანზე, ცალკეულ შემთხვევებში დაფიქსირდა ტექნიკური ხასიათის ხარვეზები, თუმცა აღნიშნულს საარჩევნო პროცესის შეფერხება არ გამოუწვევია და კენჭისყრა ყველა საარჩევნო უბანზე კანონმდებლობის სრული დაცვით მიმდინარეობს.

რაც შეეხება 89-ე უბანზე განვითარებულ მოვლენებს - პირველ რიგში ცალსახად უნდა აღინიშნოს, რომ საარჩევნო ადმინისტრაცია სრული დატვირთვით ემზადებოდა 2 აპრილის შუალედური არჩევნებისთვის და რადგან ვერიფიკაციის აპარატს საუბნო საარჩევნო კომისიები პირველად იყენებენ, ყველა შესაძლო ხარვეზი წინასწარ გათვალისწინებული და დაზღვეული იყო.

89-ე საარჩევნო უბანზეც სწორედ ასეთ შემთხვევასთან გვაქვს საქმე - ვერიფიკაციის ერთი აპარატი ამომრჩეველთა ერთიანი სიის ნაბეჭდი ვერსიით ჩანაცვლდა, ამომრჩეველთა იდენტიფიცირება კანონით დადგენილი პროცედურებით გრძელდება და საარჩევნო პროცესს ხელი არ ეშლება“, - აცხადებენ ცესკოში.