ირაკლი კობახიძე: ძლიერი მხარდაჭერა, რომელიც მოსახლეობამ „ქართულ ოცნებას“ ამ არჩევნებში კიდევ ერთხელ გამოუცხადა, ადასტურებს, რომ საზოგადოება მხარს უჭერს და აფასებს ხელისუფლების კურსს

ირაკლი კობახიძემ ამომრჩეველს შუალედურ არჩევნებში მხარდაჭერისთვის და აქტივობისთვის მადლობა გადაუხადა. შესაბამისი განცხადება „ქართული ოცნების“ თავმჯდომარემ მმართველი პარტიის ცენტრალურ ოფისში გამართულ ბრიფინგზე გააკეთა.

„ჩვენმა კანდიდატმა, ირაკლი შატაკიშვილმა მიიღო 34 ათასზე მეტი ხმა, ამომრჩეველთა ხმების 90,1%. ირაკლი შატაკიშვილს ვულოცავთ დამაჯერებელ გამარჯვებას. ირაკლი არის მაღალკვალიფიციური იურისტი, ნამდვილი პროფესიონალი და მოხარული ვართ, რომ ის მნიშვნელოვნად გააძლიერებს საპარლამენტო უმრავლესობას. როგორც მოგეხსენებათ, ბათუმის არჩევნებში მონაწილეობდა ორი კანდიდატი - ჩვენი კანდიდატი, რამაზ ჯინჭარაძე და „ნაციონალური მოძრაობის“ კანდიდატი. ჩვენმა კანდიდატმა მიიღო ამომრჩეველთა ხმების 69% და დამაჯერებელი გამარჯვება მოიპოვა. მადლობას ვუხდით ბათუმელ ამომრჩეველს გამოცხადებული ნდობისთვის, ბატონ რამაზს კი ბათუმის საკრებულოში წარმატებულ საქმიანობას ვუსურვებთ.

შეგახსენებთ, რომ ბათუმის არჩევნებში გამარჯვებით, „ქართულმა ოცნებამ“ მიიღო მანდატების უმრავლესობა ბათუმის საკრებულოში, რაც იყო აუცილებელი პირობა იმისათვის, რომ ქალაქის განვითარებისთვის მნიშვნელოვანი გადაწყვეტილებები შეფერხების გარეშე იქნეს მიღებული. მოგეხსენებათ, 2021 წლის თვითმმართველობის არჩევნების შემდეგ, ჩვენმა პარტიამ უმრავლესობა ვერ მიიღო 64-დან 8 საკრებულოში. აღნიშნული 8 საკრებულოდან 3 საკრებულოში ჩვენ უკვე შევძელით უმრავლესობის ფორმირება. დამატებით, მინიმუმ კიდევ ერთ საკრებულოში ახლო მომავალში შევძლებთ უმრავლესობის ჩამოყალიბებას. შესაბამისად, მინიმუმამდე შემცირდება ნაციონალური მოძრაობისა და მისი პარტნიორი პარტიის რესურსი, თუნდაც მინიმალური შეფერხება შეუქმნან მუნიციპალიტეტების საქმიანობას და მოსახლეობისთვის მნიშვნელოვანი პროექტების განხორციელებისას.

ძლიერი მხარდაჭერა, რომელიც მოსახლეობამ „ქართულ ოცნებას“ ამ არჩევნებში კიდევ ერთხელ გამოუცხადა, ადასტურებს, რომ საზოგადოება მხარს უჭერს და აფასებს ხელისუფლების კურსს და გადაწყვეტილებებს, რომლებიც, მათ შორის, რეგიონში მიმდინარე უმძიმეს პროცესებს უკავშირდება. საზოგადოებამ კიდევ ერთხელ გამოუცხადა უნდობლობა „ომის პარტიას“ და მის განზრახვას, პროვოკაციების გზით, საქართველო სამხედრო კონფლიქტში ჩაითრიონ. ამ არჩევნებმა კიდევ ერთხელ დაადასტურა, რომ საქართველოში სიცრუე, სიყალბე, ღალატი, „ომის პარტია“, მეხუთე კოლონა ვერასოდეს გაიმარჯვებს და ყოველთვის მძიმედ დამარცხდება. „ქართული ოცნების“ ხელმძღვანელობით, საქართველო განაგრძობს მშვიდობიან და სტაბილურ განვითარებას. კიდევ ერთხელ ვუცხადებთ მადლობას ამომრჩეველს მხარდაჭერისთვის. მაქსიმუმს გავაკეთებთ, რომ რუსთაველების, გარდაბნელების, ბათუმელებისა და მთლიანად, ქართული საზოგადოების მიერ არაერთგზის გამოცხადებული და დადასტურებული ნდობა გავამართლოთ“, - განაცხადა კობახიძემ.

შუალედური არჩევნები საქართველოში 2 აპრილს გაიმართა. ცესკოს წინასწარი მონაცემებით, რუსთავსა და ბათუმში „ქართული ოცნების“ კანდიდატებმა გაიმარჯვეს.