ლევან იოსელიანი: კითხვარის შევსებაში მონაწილეობა უნდა მიიღოს ყველამ, ამ პროცესში უნდა ჩაერთოს ოპოზიცია და არასამთავრობო სექტორიც

მთავარი დამაბრკოლებელი თუ შეიძლება რამე იყოს ჩვენი ევროკავშირში გაწევრიანების, კითხვართან მიმართებაში მათ შორის, ეს არის პოლარიზაციის მაღალი დონე, რომელიც ხელს უშლის რეფორმების გატარებას, შეთანხმებას პოლიტიკურ ჯგუფებს შორის და ეს ერთობლივი ვიზიტიც ეხმარება ყველას, ჩვენ პოლიტიკოსებს რომ კითხვარის შევსების დროს პოზიტიური გზავნილები იყოს და პასუხები იყოს გაცემული, - ამის შესახებ პარტია „მოქალაქეების“ ლიდერმა, ლევან იოსელიანმა „ქრონიკას“ განუცხადა.

მისი თქმით, კითხვარის შევსებაში მონაწილეობა ყველამ უნდა მიიღოს - ამ პროცესში უნდა ჩაერთოს ოპოზიცია და არასამთავრობო სექტორიც.

„კითხვარი რა თქმა უნდა საჯარო უნდა იყოს. ამ კითხვარის პასუხების გაცემაში მონაწილეობა ყველამ უნდა მიიღოს. გასაგებია, რომ მთავრობის ვალდებულებაა, მაგრამ ეს უნდა იყოს ინკლუზიური პროცესი, ჩაერთოს ოპოზიციაც არასამთავრობო სექტორიც. ყველამ უნდა მოინდომოს, რომ კვალიფიციურად შეივსოს ეს კითხვარი და გაეცეს პასუხები, იმიტომ რომ როგორ გავცემთ პასუხებს, ამაზე ბევრია დამოკიდებული. ჩვენ თუ ქვეყნის შიგნით არ დავიწყეთ საუბარი ფუნდამენტურად რეფორმებზე, თუნდაც სასამართლოს მიმართულებით რაღაცების ცვლილებებზე და არ გადავდგით კონკრეტული ნაბიჯები, ჩვენ ვიცით ამაზე ჩვენი დასავლელი პარტნიორების შეფასებები და კითხვარში ტყუილებს ვერ ჩავწერთ - იქ უნდა აისახოს ის, რაც არის. მე არ ვფიქრობ, რომ მათთვის ეს იქნება დამაჯერებელი ინფორმაცია. კითხვარის შევსება არის ფორმალური ნაწილი, მაგრამ არსებითად რომ მივიღოთ დასტური, ამას სჭირდება ქვეყანაში დემოკრატიული რეფორმების გატარება და ამისთვის ნაბიჯების გადადგმა. ამიტომ მე ვფიქრობ, რომ ამ ნაწილში ოპოზიციის როლი არის მნიშვნელოვანი. პასუხისმგებლობა არის ხელისუფლებაზე, მაგრამ ოპოზიციის როლი, რომ იმუშაოს ამ რეფორმების გატარების თვალსაზრისით, ამას აქვს მნიშვნელობა და მე არ მეგულება პარლამენტში ძალა, რომელიც უარს ამბობს, რომ ჩაერთოს და თავის წვლილი შეიტანოს კითხვარის პასუხების გაცემაში და რეფორმების მხრივაც ყველა მზადაა, რომ მიიღოს მონაწილეობა“, - განაცხადა იოსელიანმა.

ევროკავშირში გაწევრიანების თაობაზე საქართველოს კითხვარი გადაეცა.