შალვა პაპუაშვილი: შეთავაზება მქონდა, რომ დელეგაციაში თანაბრად იყვნენ წარმოდგენილები უმრავლესობისა და ოპოზიციის წევრები, სამწუხაროდ, ოპოზიცია ამას არ იზიარებს

პარლამენტის თავმჯდომარე უკრაინაში სავარაუდოდ კვირის ბოლოს ჩავა. ამის შესახებ შალვა პაპუაშვილმა ჟურნალისტებს განუცხადა. მისივე თქმით, ოპოზიციამ დელეგაციის შემადგენლობის კუთხით მისი შეთავაზება არ გაიზიარა.

„მე შევთავაზე ოპოზიციის წარმომადგენლებს, რომ მათი წარმომადგენლებიც იყვნენ საპარლამენტო ჯგუფში. ზოგადად, რა თქმა უნდა, სოლიდარობის გამოცხადება პარლამენტის ბევრ წევრს უნდა. დელეგაციაზე შეთავაზება მქონდა, რომ ისევე როგორც სხვა დროს ხდება, იყვნენ წარმოდგენილი უმრავლესობის წევრები და თანაბარი რაოდენობით ოპოზიციის წევრები - 3 უმრავლესობის წევრი და 3 ოპოზიციიდან. სამწუხაროდ, ოპოზიცია ამას არ იზიარებს. სამწუხაროა, რომ ეს შიდაპარტიული თემები, როგორც ჩანს, სჭარბობს ხოლმე მთავარს, რასაც ჰქვია სოლიდარობა უკრაინელი ხალხის მიმართ“, - განაცხადა პაპუაშვილმა.

მან დააზუსტა, რომ საუბარია პარლამენტის თავმჯდომარის ვიზიტზე, რასაც კონკრეტული ფორმატი აქვს. პაპუაშვილის თქმით, საუბარი იმაზე, თითქოს ამ დელეგაციის მიზანი არის ერთიანობის ჩვენება, გადაჭარბებულად მიაჩნია, რადგან დეპუტატების უკრაინაში ჩასვლის მიზანი არა შიდაპოლიტიკური ერთიანობის დემონსტრაცია, არამედ უკრაინელებისთვის სამძიმრის გამოცხადებაა.

მისივე თქმით, პოზიცია იყო, რომ თითო პოლიტიკური ჯგუფიდან ყოფილიყო თითო წარმომადგენელი, რაც ზრდის დელეგაციის რაოდენობას, თუკი ეს იქნებოდა თანაბარი, ეს 15-20-კაციანი დელეგაცია გამოვიდოდა.

„იქ ჩავდივართ პარლამენტის სახელით და არა პოლიტიკური ჯგუფების წარმომადგენლობის სახელით. რაც შეეხება დელეგაციის შემადგენლობას, ამას განვსაზღვრავთ. ზოგადად, პარლამენტის თავმჯდომარის ვიზიტის დროს დელეგაცია უნდა ასახავდეს პარლამენტის მოცემულობას, მათ შორის პროპორციას, რომელიც იქ არის. როდესაც მე მაქვს ვიზიტები, ოპოზიციის წარმომადგენლებიც არიან, თუმცა ისინი იქ ოპოზიციას კი არ წარმოადგენენ, არამედ არიან პარლამენტის წევრები. აქაც ეს შეთავაზება იყო, რომ იყოს უფრო თანაბარი წარმომადგენლობა, იგივე რაოდენობა იყოს ოპოზიციიდან“, - განაცხადა პარლამენტის თავმჯდომარემ.