გია გაჩეჩილაძე: სახელმწიფო გადატრიალებაში დაოსტატებულმა აკერმანმა ოპოზიციასთან და არასამთავრობოებთან განიხილა, როგორ გადააგდონ ხელისუფლება - მოძრაობა „აი ია“ ყოველთვის ჩვენი ქვეყნის უსაფრთხოებისა და თავისუფლების სადარაჯოზე ვიდგებით

მომღერალმა და ტელეწამყვანმა, საზოგადოებრივი მოძრაობა „აი იას“ დამფუძნებელმა გია გაჩეჩილაძემ ევროპის მოედანზე, ბერლინის კედლის ფრაგმენტთან, ჟურნალისტებთან ისაუბრა და ბაკურიანში გამართულ შეხვედრაზე გაამახვილა ყურადღება.

„საქართველოში ჩამოსული იყო პიროვნება პიტერ აკერმანი, ამერიკელი, რომელიც სახელმწიფო გადატრიალებების მოქმედებაშია დაოსტატებული. ბაკურიანში შედგა შეხვედრა და ტრენინგები ჩაატარა ქართულ ოპოზიციასთან და არა მხოლოდ მათთან, არამედ არასამთავრობო ორგანიზაციებიც იყვნენ იქ წარმოდგენილნი. ჩემი აზრით, ესაა სახელმწიფოს წინააღმდეგ შეთქმულება, რადგან იქ განიხილებოდა საკითხები, თუ როგორ შეიძლება მოიშორონ და გადააგდონ ხელისუფლება. ამიტომ, მინდა, ხმამაღლა განვაცხადო, რომ საზოგადოებრივი მოძრაობა „აი ია“ ყოველთვის ჩვენი ქვეყნის სიმშვიდის, უსაფრთხოების, უშიშროებისა და თავისუფლების სადარაჯოზე ვიდგებით. ჩვენს ქვეყანას დღეს, ისე, როგორც არასდროს, სჭირდება სიმშვიდე, დაფიქრება, ამ ყველაფრის გაანალიზება და შემდგომი განვითარება. ნურავის ექნება ტყუილად იმედი, რომ ამ ქვეყანაში გადატრიალების მსგავს რაიმეს მოაწყობს. ჩვენ ძალიან ბევრი მსგავსი შემთხვევა გავიარეთ და ყველაფერზე, რაც სახელმწიფო გადატრიალებებს შეეხება, უარი ვთქვით. უარი ვთქვით დესტრუქციაზე, რომელსაც დღევანდელი ოპოზიცია და არასამთავრობო ორგანიზაციები აკეთებენ“, - აღნიშნა გია გაჩეჩილაძემ.

მან საქართველოში აშშ-ის ელჩს, კელი დეგნანს მიმართა.

„მინდა, კითხვა დავუსვა ღრმად პატივცემულ ამერიკის ელჩს, კელი დეგნანს - მან თუ იცის, რომ ეს პატივცემული პიროვნება [პიტერ აკერმანი] ჩამოსული იყო საქართველოში და მართავდა ტრენინგებს? თუ იცის, რა მიზნით იყო ის ჩამოსული და საზოგადოებისთვის ძალიან მნიშვნელოვანია, რა პასუხი ექნება მას. მეორე - მინდა, ხელისუფლებას დავუსვა კითხვა და პრეტენზია გამოვთქვა; თქვენ თუ იცოდით, რომ ასეთი პიროვნება ჩამოდიოდა საქართველოში, რატომ არ აღკვეთეთ მისი ჩამოსვლა? რატომ შემოუშვით საქართველოში და რატომ მიეცით იმის უფლება, რომ ეწარმოებინა ასეთი ტრენინგები ბაკურიანში?“, - განაცხადა გია გაჩეჩილაძემ.