გია გაჩეჩილაძე ბაკურიანში გამართულ შეხვედრაზე: საზოგადოება მობილიზებული იქნება - ჩვენ გავაკეთებთ მობილიზაციას, რომ არავის ავარევინოთ ოფლით მოტანილი მშვიდობა

„ახლა ჩვენ ბეწვის ხიდზე გავდივართ და ამას როგორ ვერ ხვდებიან ის ადამიანები, რომლებიც ბაკურიანში იკრიბებიან?“, - განაცხადა მომღერალმა და ტელეწამყვანმა, საზოგადოებრივი მოძრაობა „აი იას“ დამფუძნებელმა გია გაჩეჩილაძემ „ქრონიკასთან“, ბაკურიანში გამართულ შეხვედრასთან დაკავშირებით საუბრისას.

მისი თქმით, საზოგადოებრივი მოძრაობა „აი ია“ყველაფერს გააკეთებს, რომ ქვეყანაში სიმშვიდე შენარჩუნდეს.

„დღეს საზოგადოებაში არის სიმშვიდის, ფიქრის, სტაბილურობის, სიტუაციის გაანალიზების განწყობა. აღარ უნდა შევიდეთ იმავე მდინარეში, რომელშიც 30 წლის წინ შევედით. ეს უკვე გავიარეთ, ამის შემდეგ, სამაგალითო პროცესები მოხდა - 100 000 კაცი იკრიბებოდა ყოველდღე, პროტესტის ნიშნად, მაგრამ მივედით იქამდე, რომ ეს არ გავაკეთეთ. როგორ შეიძლება, ახლა ისევ 1990-იანი წლების დასაწყისში მივტრიალდეთ?! საზოგადოებაც ნერვიულობს, განიცდის ამ ყველაფერს. ახლა ჩვენ ბეწვის ხიდზე გავდივართ და ამას როგორ ვერ ხვდებიან ის ადამიანები, რომლებიც ბაკურიანში იკრიბებიან? საზოგადოება მობილიზებული იქნება იმისთვის, და ჩვენ გავაკეთებთ ამის მობილიზაციას, რომ არავის ავარევინოთ ოფლით მოტანილი მშვიდობა“, - განაცხადა გია გაჩეჩილაძემ.

გია გაჩეჩილაძემ დღეს ევროპის მოედანზე, ბერლინის კედლის ფრაგმენტთან, ჟურნალისტებთან ისაუბრა და ბაკურიანში გამართულ შეხვედრაზე გაამახვილა ყურადღება.

6-8 აპრილს Rooms Kokhta-ში „ნაციონალური მოძრაობისა“ და რადიკალური ოპოზიციის შეკრება გაიმართა. „კვირას“ ინფორმაციით, ბაკურიანში გამართული შეხვედრის მთავარ საკითხს ხელისუფლების დამხობის გეგმის შემუშავება წარმოადგენდა, რაშიც რადიკალური ოპოზიციის ყველა წარმომადგენელი მონაწილეობდა (ხატია დეკანოიძე – „ნაციონალური მოძრაობა“, ბათუ ქუთელია – „დროა“, გიგა ბოკერია – „ევროპული საქართველო“, ზურაბ ჯაფარიძის „გირჩისა“ და პარტია „ლელოს“ წარმომადგენლები). შეხვედრას ასევე ესწრებოდნენ მიშა მშვილდაძე ტელეკომპანია „ფორმულადან“ და „მთავარი არხის“ წარმომადგენლები.

არასამთავრობო ორგანიზაციებიდან შეხვედრას გიორგი მშვენიერაძე და „სირცხვილიას“ აქტივისტები ესწრებოდნენ. ბაკურიანში არ მიიწვიეს არც ერთი ოპოზიციური პარტია, რომლებიც სააკაშვილის მიმართ ღია მხარდაჭერას არ გამოხატავენ.

შეხვედრის ტრენერი და მოდერატორი ცნობილი პოლიტტექნოლოგი პიტერ აკერმანი იყო.