ზოგადი განათლების შესახებ კანონში ცვლილებების განხილვას პარლამენტში კამათი მოჰყვა

პარლამენტის პლენარულ სხდომაზე კამათი იყო. დაპირისპირება ოპონენტებს შორის ზოგადი განათლების შესახებ კანონში ცვლილებების განხილვის დროს დაიწყო.

„ნაციონალური მოძრაობის“ წევრმა, თინა ბოკუჩავამ, უმრავლესობის წარმომადგენლის, თამარ ტალიაშვილის გამოსვლას ამორალური უწოდა.

„არ ვარ განათლების კომიტეტის წევრი, მაგრამ იმდენად აღმაშფოთებელი, დაუსაბუთებელი, გაუმართლებელი და ამორალურიც კი ყო ქალბატონი თამარის გამოსვლა, რომ იძულებული გავხდი ამ საკითხზე მესაუბრა. ქალბატონმა თამარმა გუშინ თქვა: „თქვენ რომ რაიმე გაგეკეთებინათ განათლების სისტემაში, მაშინ ჩვენ ასეთ მდგომარეობაში არ დაგვხვდებოდა სისტემა“. ქალბატონო თამარ, მე არ ვიცი სად გაიზარდეთ. უნივერსიტეტში მოსახვედრად აუცილებელი იყო 5-დან 10 ათას დოლარამდე ქრთამის გადახდა“, - განაცხადა ბოკუჩავამ.

თამარ ტალიაშვილმა კი უპასუხა, რომ საზოგადოებას აღარ აინტერესებს „ნაციონალური მოძრაობის“ დაძველებული უარგუმენტო რიტორიკა, საზოგადოებას აინტერესებს წინსვლა და ეს ხდება „ქართული ოცნების“ ხელისუფლების ლიდერობით ევროატლანტიკურ გზაზე.

„ჩემი მიზანი არ არის, რომ „ნაციონალურმა მოძრაობამ“ ჩემი ნაბიჯები პოზიტიურად შეაფასოთ, რადგან სწორედ თქვენი ხელისუფლების პერიოდში განხორციელდა ძალიან ბევრი პედაგოგიკის, სკოლის, უნივერსიტეტისა და სკოლამდელი განათლების დამაზიანებელი საქმე. ჩვენ უნდა გავიხსენოთ რეალურად პედაგოგის, სკოლის დირექტორის და სკოლის ავტონომიის სრულად დამაკნინებელი მანდატურის სამსახურის იმგვარად შემოღება, რომელიც პრაქტიკულად საშუალებას არ აძლევდა სკოლას, რომ დამოუკიდებლად ემუშავა. პედაგოგს არ ეძლეოდა უფლებას იმისა რომ განეხორციელებინა თავისი საქმიანობა. მაგალითად, თბილისში 100-ზე მეტი აღმზრდელი იქნა დათხოვნილი სამსახურიდან ერთი განცხადებით, ერთი ხელის მოწერით მაშინდელი თქვენი მერის გიგი უგულავას მიერ. სწორედ თქვენმა ხელისუფლებამ, 2011 წელს აღმზრდელ-პედაგოგებს სტატუსი ჩამოართვა და ჩვენ ახლა მიმდინარე რეფორმით ვაკეთებთ იმას, რომ დავუბრუნოთ აღმზრდელებს პედაგოგის სტატუსი. დიახ, თქვენ მხოლოდ ახლა დაინტერესდით რას ფიქრობენ სკოლამდელი დაწესებულების მუშაკები, ჩვენ ეს კარგად შესწავლილი გვაქვს და ვისაუბრე კიდეც იმ შეხვედრასთან დაკავშირებით, რომელიც გაიმართა პედაგოგებთან, აღმზრდელებთან და სწორედ მათ დააყენეს ასაკთან დაკავშირებული აღნიშნული საკითხი. უპასუხოდ დატოვეთ კითხვა პედაგოგიკური სკოლის განადგურებასთან დაკავშირებით,რომელი „ნაციონალური მოძრაობის“ ხელისუფლების დროს განხორციელდა. ჩვენ ახალი კურიკულუმებით, ახალი საუნივერსიტეტო პროგრამებით ვაკეთებთ იმას, რომ პედაგოგიკის შემსწავლელი კურსები შემოგვაქვს სასწავლო სისტემაში.

„ნაციონალური მოძრაობა“ საუბრობს ზოგადად და არ შედის სიღრმეებში, რადგან არ მოსწონთ ციფრებით ასახული ქართული ოცნების შედეგები. ციფრები, რომელიც ჩვენ ხელთ გვაქვს. 2012 წლიდან დღემდე აშენდა 174, 1754 სკოლა რეაბილიტირდა, ხოლო სრულად რეაბილიტირდა 257 საჯარო სკოლა. რაც შეეხება სკოლამდელი განათლების რეფორმას, აქაც გვაქვს ფაქტები. 2014 წელს როდესაც ქართული ოცნება მოვიდა მუნიციპალურ ხელისუფლებაში, მაგალითად თბილისში ჩვენ დაგვხვდა 47 დახურული და ზოგიერთი გასხვისებული სკოლამდელი აღზრდის დაწესებულება.მათ შორის ერთ-ერთში, მესამე ბაგა-ბაღში, ჩუღურეთში, ჩვენ დაგვხვდა ნაციონალური მოძრაობის ოფისი. ნაცვლად იმისა, რომ იქ მოსწავლეებს აღზრდა მიეღოთ, დაგვხვდა პარტიული სიმბოლოები. ეს არის მოკლედ ის, რაც ასახავს ნაციონალური მოძრაობის დამოკიდებულებას პედაგოგებისადმი. ეს არის რეალური სიმართლე თქვენს შესახებ“, განაცხადა ტალიაშვილმა.