მამუკა მდინარაძე: ჩვენი მთავარი გზავნილი იქნება მხარდაჭერა უკრაინელი ხალხის მიმართ, ასევე, სამძიმარი იმ უბედურების გამო, რაც დღეს უკრაინაში ხდება

ჩვენი მთავარი გზავნილი იქნება მხარდაჭერა უკრაინელი ხალხის მიმართ, ასევე, სამძიმარი იმ უამრავი დაღუპული ჯარისკაცისა და უდანაშაულო ადამიანების გამო, იმ უბედურების გამო, რაც დღეს უკრაინაში ხდება, - ამის შესახებ განაცხადა „ქართული ოცნების“ აღმასრულებელმა მდივანმა, მამუკა მდინარაძემ.

მისი თქმით, სამწუხაროდ, ბოლო პერიოდის განმავლობაში იყო ბევრი მცდელობა, რათა ბოლომდე გაფუჭებინათ საქართველო-უკრაინის ურთიერთობები.

მდინარაძემ მოიშველია უკრაინის საკანონმდებლო ორგანოს ხელმძღვანელის, სტეფანჩუკის განცხადება, რომ არსებული გაურკვევლობები წარსულს ჩაბარდა. მდინარაძემ დასძინა, რომ ამ საქმეში პოზიტიური როლი საქართველოს თავმჯდომარემაც შეასრულა და ეს მას არ უნდა დავუკარგოთ. მისივე განცხადებით, ეს ხდებოდა იმ დროს, როდესაც ზოგიერთი პარტია და პარტიული ტელევიზია პაპუაშვილის „გაშავებით“ იყვნენ დაკავებული.

„ჩვენ ხელ-ფეხი გაგვეხსნა საიმისოდ, რომ კიდევ უფრო ვცადოთ, ჩვენი პოზიტიური ურთიერთობებისა და მეგობრობის გაღრმავება, მით უმეტეს, როდესაც ამ სიტუაციაში, უკრაინელ ხალხს ეს მხარდაჭერის სახით სჭირდება.

ჩვენი მთავარი გზავნილი იქნება მხარდაჭერა უკრაინელი ხალხის მიმართ, ასევე, სამძიმარი იმ უამრავი დაღუპული ჯარისკაცისა და უდანაშაულო ადამიანების გამო, იმ უბედურების გამო, რაც დღეს უკრაინაში ხდება. ჩვენთვის ეს იქნება, იმ ბევრ მხარდაჭერის აქტთან ერთად, რაც საერთაშორისო პოლიტიკურ პლატფორმებზე მოვახდინეთ უკრაინის მისამართით, დამატებით კიდევ ერთი პოზიტიური ჟესტი ჩვენი მეგობრების მიმართ“, - დასძინა მდინარაძემ.

შალვა პაპუაშვილმა უკრაინაში ვიზიტისთის მზადყოფნა გამოთქვა, საკითხთან დაკავშირებით კონსულტაციები საპარლამენტო ოპოზიციასთანაც მიმდინარეობდა, თუმცა მხარეები დელეგაციის შემადგენლობაზე ვერ შეთანხმდნენ. მოგვიანებით კი „ლელოში“ განაცხადეს, რომ მათი წარმომადგენელი მზად იქნება, მონაწილეობა მიიღოს როგორც ოპოზიციური პარტიების დელეგაციაში, ისე პარლამენტის თავმჯდომარის დაგეგმილ ვიზიტში უკრაინაში.

შემდეგ კი მამუკა მდინარაძემ განაცხადა, რომ „ქართული ოცნება“ მზად არის საპარლამენტო დელეგაციის შემადგენლობაში ყველა ოპოზიციური პოლიტიკური ჯგუფის თითო წარმომადგენელი შევიდეს. შალვა პაპუაშვილმა კი ბიუროს დღევანდელ სხდომაზე ოპოზიციურ პარტიებს მოუწოდა, დროულად წარადგინონ ინფორმაცია უკრაინაში გასამგზავრებელი კანდიდატების შესახებ.

ამასთან, „ნაციონალური მოძრაობა“ უარს ამბობს იმ საპარლამენტო დელეგაციაში ადგილზე, რომელიც შალვა პაპუაშვილის ხელმძღვანელობით უკრაინაში ჩავა. ვიზიტზე უარს „ევროპელი სოციალისტებიც“ ამბობენ.