ირაკლი ზარქუა საფრანგეთის ელჩის განცხადებაზე: უბრალოდ თხოვნა და სურვილი იყო რომ უფრო მეტი ღიაობა ყოფილიყო გვარამიას განაჩენის გადაწყვეტილებაზე

ირაკლი ზარქუამ საფრანგეთისა და აშშ-ის ელჩების მიერ ნიკა გვარამიას საქმეზე გაკეთებული განცხადებები შეაფასა. ამ თემაზე საპარლამენტო უმრავლესობის წევრმა „ქრონიკაში“ ისაუბრა.

„თავიდან ბოლომდე ვეთანხმები ამერიკისა და საფრანგეთის ელჩების განცხადებებს. სწორი თქვეს - შიდასახელმწიფოებრივ დავებში არ უნდა ჩაერიონ და მათი პოზიცია სწორია. იქვე დასძინეს, რომ ეს არის მაღალი საზოგადოებრივი ინტერესის საქმე და შესაბამისად, კარგი იქნება თუ მეტი გამჭვირვალობა იქნებოდა შედეგის დადგომის შემდეგ. ამით იყო განპირობებული, რომ გუშინ ამ საქმის პროკურორი მთელი დღეს იჯდა ეთერში და ამ თემის ირგვლივ გაცემულ კითხვებს პასუხობდა. ამ აქცენტზე იყო ადეკვატური პასუხი და დღეს მგონი არავის აქვს განცდა და ამაზე მეტყველებდა სწორედ საფრანგეთის ელჩის განცხადება, რომ შიდა საქმეებში არავინ ერევა და არც აქვთ ამის უფლება. უბრალოდ თხოვნა და სურვილი იყო რომ უფრო მეტი ღიაობა ყოფილიყო ამ გადაწყვეტილებაზე“, - განაცხადა ზარქუამ.

საფრანგეთის ელჩმა, დიეგო კოლასმა ნიკა გვარამიას საქმეზე საუბრისას აღნიშნა, რომ კანონზე მაღლა არავინ დგას, მათ შორის ჟურნალისტი, მაგრამ აუცილებლად დაისმება კითხვა თავისუფალ სიტყვაზე გავლენის აცილების შესახებ. აშშ-ის ელჩმა კელი დეგნანმა კი აღნიშნა, რომ არ უნდა არსებობდეს თუნდაც აღქმა, რომ რაღაც საკითხი პოლიტიზირებულად იყო გადაჭრილი.

„მთავარი არხის“ დამფუძნებელს, ნიკა გვარამიას 3 წლითა და 6 თვით თავისუფლების აღკვეთა მიესაჯა. ის რუსთავის ციხეში გადაიყვანეს.