წულუკიანი: სტრასბურგის მოსამართლეობის კანდიდატის გასამართლებული ყუფარაძე იუსტიციის სამინისტროში მუშაობს

იუსტიციის სამინისტროში სტრასბურგის მოსამართლეობის კანდიდატების შერჩევა მიმდინარეობს. სამთავრობო კომისიის წევრებმა ყველაზე მეტი კითხვა თამარ ალანიას დაუსვეს, რომელიც გვანცა ყუფარაძის საქმის მოსამართლე იყო. ინფორმაციას 1tv ავრცელებს.

კომისიის წევრი, სახალხო დამცველი უჩა ნანუაშვილი დაინტერესდა, ალანია ყუფარაძეს რომ შეხვდეს, რომლის მიმართაც გამამტყუნებელი გადაწყვეტილება გამოიტანა, რას ეტყოდა. ნანუაშვილს ალანიამ უპასუხა, რომ მას მიესალმება.

ალანიას იუსტიციის მინისტრი თეა წულუკიანი გამოეხმაურა და აღნიშნა, რომ გვანცა ყუფარაძე იუსტიციის სამინისტროში მუშაობს. წულუკიანის საპასუხოდ, ალანიამ აღნიშნა, რომ მოსამართლეობის დროს გადაწყვეტილებებს საქმის საფუძველზე იღებდა და არა პირადი განწყობით. მისი თქმით, მას გადაწყვეტილების მიღების შემდეგ ბევრი ბრალდებული შეხვედრია.

თეა წულუკიანმა აღნიშნა, რომ ყუფარაძემ საქმე კი არა, ლამის სიცოცხლე წააგო.. „თქვენი გადაწყვეტილებით, ეს ადამიანი ციხეში მოხვდა და სრულწლოვანი იქ გახდა. ეს ახალგაზრდა ქალბატონი იუსტიციის სამინისტროს თანამშრომელია და მოსამართლეობას აპირებს. სახელმწიფო ისეთი საქმეების გამოსწორებას გეგმავს, რომელთაც ადამიანები დაანგრიეს და მით უმეტეს, გოგონა“, - აღნიშნა წულუკიანმა.

ალანიამ აღნიშნა, რომ გვანცა ყუფარაძე პატიმრობის დროს სამარტოო საკანში არ იმყოფებოდა და სასჯელს სრულწლოვან ქალბატონებთან ერთად იხდიდა. მისი თქმით, ცოტა ხნის წინ მან საქმე გამოითხოვა და კვლევა დაიწყო, ხომ არ იყო დარღვევა, რომ ბრალდებული სრულწლოვან ქალბატონებთან ერთად იყო საკანში. ალანიას ცნობით, გაერო მიიჩნევს, რომ თუკი არასრულწლოვანი სამარტოო საკანში მოხვდება, დარღვევა ეს არ არის. „თუ ვინმეს საქმის დეტალები დააინტერესებს, ეს საქმე არქივში ინახება“, - აღნიშნა ალანიამ.

თავის მხრივ, ალანიას წულუკიანი გამოეხმაურა და განაცხადა, რომ პატიმრობის დროს, ყუფარაძე სრულწლოვან ქალბატონებთან ერთად იყო და მისი მამის მიერ ეს საქმე სტრასბურგში გასაჩივრდა, რომელიც სამწუხაროდ, გარდაიცვალა. „ამ საქმის მიმართ კითხვები არსებობს“, - აღნიშნა წულუკიანმა.

ალანიამ მინისტრის საპასუხოდ განაცხადა, რომ მას კითხვებზე პასუხის გაცემის უფლებას სამოსამართლეო ეთიკა არ აძლევს. ალანიას განცხადებით, როცა საქმე მასთან მივიდა, იფიქრა, გოგოს როგორ შეიძლებოდა ეს საქციელი ჩაედინა, მაგრამ შემდეგ ბრალდებულის ფსიქოტიპი ნახა. ალანიას თქმით, როცა გადაწყვეტილება იქნა მიღებული, იმასაც ამბობდნენ, რომ დაზარალებული კუბლაშვილის ნათესავი იყო. ალანიას ამ რეპლიკას წულუკიანი გამოეხმაურა და მას მიმართა - „მესმის, რომ კუბლაშვილს მისტირით“.

წულუკიანმა ყურადღება იმაზეც გაამახვილა, რომ ყუფარაძის საქმე სტრასბურგშია და მან თავდაცვაზე უარი თქვა. „მთავრობას ამის უფლება აქვს, მაგრამ სინდისთან ვერ მოვრიგდებით. სიტუაცია ისეთია, რომ მთავრობა ამ საქმეზე რაიმე პოზიციის დაფიქსირებაზე უარს ამბობს. სტრასბურგს ვუთხარით, გადაწყვეტილება თავად მიიღოს. სტრასბურგის გადაწყვეტილებას დაველოდოთ“, - დასძინა წულუკიანმა.

იუსტიციის საბჭოს ყოფილმა წევრმა თამარ ალანიამ სტრასბურგის მოსამართლეობის კონკურსში მონაწილეობაზე განაცხადი ისევ შეიტანა. „მე არ ვარ დაწუნებული კანდიდატი - წინა კონკურსზე ქულების რაოდენობით რიგით მეოთხე ვიყავი და აბსოლუტურად ლეგიტიმურად მაქვს იმის პრეტენზია და უფლება, რომ კონკურსში კიდევ ერთხელ მივიღო მონაწილეობა“, - აცხადებს ჟურნალისებთან საუბრისას სტრასბურგის მოსამართლეობის კანდიდატი.

იუსტიციის სამინისტროში ადამიანის უფლებათა ევროპულ სასამართლოში საქართველოდან ასარჩევი მოსამართლეობის კანდიდატთა შესარჩევი კონკურსი დაიწყო. სტრასბურგის სასამართლოში საქართველოდან მოსამართლეების შესარჩევი კონკურსი მესამედ გამოცხადდა.