მოსამართლე თამარ ალანია სტრასბურგის მოსამართლეობის შესარჩევ კონკურსში განმეორებით მონაწილეობს

იუსტიციის საბჭოს ყოფილი წევრი თამარ ალანია სტრასბურგის მოსამართლეობის კონკურსში მონაწილეობას ისევ გეგმავს. „მე არ ვარ დაწუნებული კანდიდატი - წინა კონკურსზე ქულების რაოდენობით რიგით მეოთხე ვიყავი და აბსოლუტურად ლეგიტიმურად მაქვს იმის პრეტენზია და უფლება, რომ კონკურსში კიდევ ერთხელ მივიღო მონაწილეობა“, - აცხადებს ჟურნალისებთან საუბრისას სტრასბურგის მოსამართლეობის კანდიდატი თამარ ალანია.

მოსამართლე მისი საბჭოში მუშაობის პერიოდში მის მიმართ გამოთქმულ კრიტიკასაც გამოეხმაურა. „ადამიანი თუ არ მუშაობს კრიტიკაც არ არის. ბუნებრივია ხარვეზები ყოველთვის არსებობს და უხარვეზო არ არის არათუ საქართველოს იუსტიციის უმაღლესი საბჭო, არამედ ევროპის არც ერთი სასამართლო და თვით ამერიკის სასამართლოებიც და შესაბამისი სტრუქტურები“, - ამბობს ალანია.

„მე გახლავართ მოქმედი მოსამართლე 11-წლიანი გამოცდილებით, მაქვს სტრასბურგში მუშაობის გამოცდილება იურისტად, გავიარე სპეციალური კონკურსი, რომელიც ევროპის ადამიანის უფლებათა სასამართლომ ჩაატარა, სადაც გავიმარჯვე. შესაბამისად 6 თვე ვიყავი მივლინებული სტრასბურგის სასამართლოში. ჩემი გამოცდილება მაძლევს უფლებას, რომ განვაცხადო პრეტენზია აღნიშნულ თანამდებობაზე“, - ამბობდა ალანია წინა კონკურსის დროს.

დღეს იუსტიციის სამინისტროში ადამიანის უფლებათა ევროპულ სასამართლოში საქართველოდან ასარჩევი მოსამართლეობის კანდიდატთა შესარჩევი კონკურსი დაიწყო. სტრასბურგის სასამართლოში საქართველოდან მოსამართლეების შესარჩევი კონკურსი მესამედ გამოცხადდა. სპეციალური სამთავრობო კომისია 8 პრეტენდენტს გაესაუბრება.

კონკურსში მონაწილეობის სურვილი 28 კანდიდატმა გამოთქვა, რომელთაგან 21 იურისტია (ბაკალავრიატის დონე და ზევით). კანდიდატებს შორისაა მოსამართლე თამარ ალანიაც.