ჰერმან საბო: არ უნდა დაგვავიწყდეს, რომ კანდიდატის სტატუსის მიღების პროცესში თვითკრიტიკულები უნდა ვიყოთ, მათ შორის „ქართული ოცნებაც“ და ვაღიაროთ ის პრობლემები, რაც გვაქვს

ძალიან რთულია ბატონ პრემიერს სიტყვაზე ენდო, როდესაც მან ბრიუსელიდან ჩამოსვლის შემდეგ განაცხადა, რომ იქ ვიღაცები დადიან და ამბობენ, რომ „ქართული ოცნების“ პერიოდში საქართველოს არ უნდა მისცენ [ევროკავშირის წევრობის] კანდიდატის სტატუსი, თუმცა ვერც იმას გამოვრიცხავ, რომ ასეთი ქმედებები განხორციელებულიყო, - ამის შესახებ ჰერმან საბომ „ქრონიკაში“ განაცხადა. „გირჩის“ წევრი მიიჩნევს, რომ თუ ასეთი ადამიანები ოპოზიციაში არიან, მათი რაოდენობა მცირეა.

„ეს ყოვლად მიუღებელია. არ შეიძლება, რომ პირად პოლიტიკურ „აჯენდას“ გადავაყოლოთ ქვეყნის ეს შანსი. მაგრამ არ უნდა ავურიოთ ერთმანეთში ის, რომ შესაძლოა ასეთი განცხადებებით ვინმე დადიოდეს ბრიუსელში და ხელისუფლების კრიტიკა. ჩვენ გვესმის ოპოზიციონერი დეპუტატების მხრიდან ხელისუფლების კრიტიკა იმ საკითხებზე, რომლებზეც თვითონ დასავლეთიც კი კრიტიკულია ხელისუფლების მიმართ. ასეთი განცხადებები შეიძლება ძალიან სასიამოვნო და პროცესის ხელის შემწყობი არ იყოს, მაგრამ არ უნდა დაგვავიწყდეს, რომ ამ პროცესში თვითკრიტიკულები უნდა ვიყოთ, მათ შორის „ქართული ოცნებაც“ და ვაღიაროთ ის პრობლემები, რაც გვაქვს, რასაც ჩვენი მეგობრები ხედავენ. თვალში ნაცრის შეყრა იქნება, რომ ვთქვათ: „ყველაფერი იდეალურადაა და როდის მიგიღებთ“, - განაცხადა საბომ.